Kreu i Vetëvendosjes në Shqipëri Boiken Abazi, njëkohësisht kandidat i pavarur në zgjedhjet e 25 prillit, ka denoncuar sërish me dokumenta vjedhjen e votave që sipas tij, ka ndodhur në Tiranë.
Abazi shprehet se vëzhguesit e kandidatëve të pavarur të mbështetur nga “Lëvizja Vetëvendosje” kanë identifikuar në masë këtë mënyrë “numërimi” votash, ku katrori i subjektit zgjedhor me nr. 13 mbulohej gjatë gjithë kohës sa shfaqej fleta e votimit në ekranin e tavolinave të numërimit.
Kjo metodë “numërimi”, shton, është në shkelje flagrante të Kodit Zgjedhor dhe Udhëzimeve të KQZ-së.
Duke mbuluar katrorin e subjektit zgjedhor me numër 13, nuk lejohet të kuptohet nëse në atë katror ka patur ose jo një “X”, thotë ai.
Si fenomen i përhapur në masë, le të kuptohet se ka qenë pjesë e një plani të manipulimit të vullnetit të qytetarëve për të nxjerr jashtë loje kandidatët e pavarur, shton Abazi.
“Më poshtë, evidentimin e kësaj shkeljeje e kemi ilustruar edhe me disa shembuj me fotografi, të cilët janë depozituar edhe në KQZ/KAS si pjesë e ankesës tonë zyrtare”, përfundon ai, duke postuar në FB dhe disa fotografi.
