Elisabetta Belloni është emëruar në krye të shërbimeve sekrete italiane.
Emërimi i saj u mirëprit nga politikanët italianë, përfshirë kreun e partisë së Lidhjes Matteo Salvini, i cili e përshkroi atë si “një grua me guxim”.
Departamenti i Sigurisë së Informacionit mbikëqyr shërbimet e huaja dhe të brendshme të inteligjencës së vendit dhe i raporton drejtpërdrejt qeverisë italiane.
Belloni, ka lindur në 1958 dhe ajo iu bashkua Institutit prestigjioz Massimiliano Massimo në Romë, ku studioi edhe kryeministri Draghi.
Dikur ky institut ishte vetëm për meshkuj. Pasi shërbeu si diplomate në Vjenë dhe Bratislavë, ajo ishte pjesë e Ministrisë së Jashtme italiane nga 2004 në 2008.
Gjatë kësaj kohe, informon dritare.net, Bellonit iu desh te merrej me çështje mjaft të ndjeshme.
Ndër to ishin vrasjet apo plagosjet e italianeve jashtë vendit, rrëmbimet në Afganistan dhe Irak, po kështu të mbikëqyrte operacionet e shpëtimit për italianët e prekur nga cunami shkatërrues i Oqeanit Indian të vitit 2004.
Zonja Belloni u bë e para grua që mbajti rolin e sekretarit të përgjithshëm të ministrisë së jashtme, posti më i lartë diplomatik i Italisë, që ajo e ka mbajtur deri më tani!
