“Bëmat” e Ergys Verdho të ARRSH. Babë e bir fitojnë pa garë tenderin 1.5 milionë euro

Nga Boldnews.al

Autoriteti Rrugor Shqiptar, një institucion i drejtuar nga Ergys Verdho, ka shpallur fitues të një tenderi me vlerë rreth 1.5 milionë euro për sinjalistikën në akset nacionale të rajonit Qendror një bashkim operatorësh, të përbëra nga dy kompani, të drejtuar nga babë e bir.

Në tenderin e mbyllur së fundit, kanë marrë pjesë 8 operatorë ekonomikë.

Pasi janë skualifikuar 7 prej tyre, në garë ka mbetur vetëm bashkimi i kompanive “R.S&M” dhe ‘Si-Si-Al”, e para në pronësi të Nikolla Çaçi dhe e dyta në pronësi të djalit të tij, Stefan Çaçi.

Tenderi
Në mesin e muajit Mars 2021, Autoriteti Rrugor Shqiptar shpalli tenderin “Përmirësim i Sinjalistikës Horizontale në Akset dhe Segmentet Rrugore të Rajonit Qëndror”

Fondi limit i parashikuar për këtë tender ishte më shumë se 1.5 miliardë lekë të reja.

Në bazë të të dhënave zyrtare rezulton se në tender kanë marrë pjesë një numër i konsiderueshëm operatorësh, pjesa më e madhe fitues permanent të kontratave të fuqishme për vepra të infrastrukturës.

Pasi janë hapur ofertat, ARRSH e drejtuar nga Ergys Verdho ka vendosur të skualifikojë 7 prej 8 konkurentëve. Konkretisht, janë eleminuar nga gara: ‘Elda VL”, “Eral Construction”, “Sireta 2F”, “Fusha”, “Madekonst”, “Ndregjoni” dhe ‘IDK Konstruksion”.

Në garë mbeti vetëm bashkimi i operatorëve ‘R.S & M” shpk, ‘SI.SI-Al” dhe “GPG Company”, të cilët gjithësesi nuk kishin paraqitur ofertën më të ulët.

Megjithatë, pas eleminimit të të gjithë konkurentëve, kompanitë e drejtuara nga familjarët Çaçi arritën të fitonin kontratën miliarda lekë.

Fituesit, babë e bir
Kompania “R.S&M” është themeluar në vitin 2003 nga Nikolla Çaçi.

Shoqëria ka si objekt të veprimtarisë së saj, “Studim, projektim, prodhim, montim, tregtim dhe zbatim i sinjalistikës rrugore vertikale dhe horizontale, ndriçuese dhe jo ndriçuese, vijëzime, barriera rrugore (guardrails), etj”.

Ndërsa kompania tjetër, “SI.SI-Al” është krijuar në Maj 2007 dhe është në pronësi të Stefan Çaçit, i cili në atë kohë ishte vetëm 18 vjeç.

Kompania ka për objekt veprimtarie thuajse të njëjtën që ka edhe shoqëria tjetër, e Nikolla Çaçit. Konkretisht. “Projektim-zbatim në fushën e ndërtimit. Import-eksport, tregti e mallrave të ndryshme me shumicë dhe pakicë. Projektim-zbatim, sinjalistikë rrugore horizontale dhe vertikale, ndriçuese dhe jo ndriçuese, barriera dhe mbrojtje rrugore”, e të tjerë.