Bylykbashi: Sot duhet të faktojmë krimet zgjedhore, më pas analiza

Oerd Bylykbashi, anëtar i Kryesisë së PD, ishte i ftuar në Absolut 4 nga ku u shpreh se ai është një nga zërat më kritik në lidhje me vendimet e marra nga PD, ku përmendi djegien e mandateve, si dhe bojkotin e zgjedhjeve lokale.

Por, Bylykbashi theksoi se tani nuk është momenti që të bëhet kjo analizë, por të faktohet ajo që ka ndodhur në zgjedhjet e 25 prillit.

“Unë jam një nga individët më kritikë për shumë nga vendimet që janë marrë, por jam luajal gjithashtu.

Shqetësimet i ngre brenda partisë, i diskutoj brenda dhe zbatoj edhe vendimet e partisë, duke nisur me djegien e mandateve, mos-hyrja në zgjedhje, e të tjera me radhë.

Kjo analizë nuk ndodh sot. Kjo analizë bëhet më mbrapa. Sot kemi për detyrë të faktojmë këto që kanë ndodhur që njerëzit të kuptojnë, a mos jemi në një udhëkryq shumë të rrezikshëm, ku zgjedhjet nuk kanë më rëndësi në Shqipëri.

Nëse arrijmë në këtë konkluzion kemi mbyllur punë me demokracinë”, tha ai.

Sa i përket 25 prillit, Bylykbashi u shpreh se PD do të ndjekë të gjitha rrugët ligjore.