VIDEO/ 10 minuta në ajër, helikopteri nuk ulet dot te Trauma, transportonte minatorin e plagosur

Një prej minatorëve të asfiksuar në minierën e Martaneshit mesditën e sotme, është transportuar me urgjencë drejt Tiranës për marrjen e një shërbimi më të specializuar mjekësor.

Gjendja e tij shfaqet e rënduar, ku dhe siç shihet dhe në pamjet e siguruara nga FaxNews, minatori 50-vjeçar i identifikuar me inicialet Sh. E., transportohet me barrel në gjendje të pavetëdijshme drejt helikopterit të urgjencës.

Pasi ka mbërritur te Trauma helikopteri nuk ka mundur dot të ulet pas dy tentativave dhe tashmë sipas raportimeve nga vendngjarja, ai nuk shihet më as në hapësirën ajrore mbi spital.

Policia e Shtetit në sqarimin e dhënë mbi ngjarjen, bëri me dije se punonjësi 50-vjeçar i minierës i dëmtuar rëndë, u asfiksua nga gazi i gjeneratorit teksa ishte duke salduar në galeri. Në ndihmë të tij kanë ardhur dhe dy punonjës të tjerë, të cilët gjithashtu shfaqën probleme shëndetësore.

Të tre këta persona janë nxjerrë nga miniera dhe janë transportuar për të marrë ndihmën e nevojshme mjekësore në spital, ku saldatori është sjellë në Tiranë me helikopter, por pa mundur dot të ulet te Trauma është ulur në QSUT.