Detaje të reja bëhen me dije nga aksidenti i ndodhur këtë të Martë në një galeri në zonën e Bulqizës.
Ministria e Infrastrukturës njoftoi se nga të dhënat paraprake të inspektimit të vendngjarjes, rezulton se gjatë saldimit në nëntokë të një vagoni mineralesh është çliruar gaz nga gjeneratori i përdorur dhe si rrjedhim mekaniku SH.D., 45 vjeç ka humbur ndjenjat. Pranë tij ka qenë edhe një punonjës tjetër, i cili gjithashtu ka pasur shqetësime.
Prezent në vendin e ngjarjes, në një distancë më të largët kanë qenë 3 punonjës të tjerë, të cilët u kanë ardhur në ndihmë kolegëve të tyre, duke e nxjerrë SH.D. jashtë galerisë. Ai është dërguar me helikopter në drejtim të Tiranës, për të marrë ndihmën mjekësore, ndërkohë që punonjësi tjetër është dërguar në spitalin e Bulqizës, ku ndodhet jashtë rrezikut për jetën.
Në galeri nuk ka pasur shembje dhe as minatorë të bllokuar, sqarohet në njoftim.
Sipas të njëjtave burime, ngjarja ka ndodhur rreth orës 12:30, në galerinë Nr.1240, Zona e Re Batër (Qarku Dibër), e cila shfrytëzohet nga shoqëria “Xhireton” shpk, me Leje minerare nr. 479/2.
Referuar të dhënave në Qendrën Kombëtare të Biznesnit, “Xhireton” shpk është në pronësi të Asim Zajmit, me administrator Enton Zajmin.