Nishani: Ja pse duhet të ikë Basha, e keqja e Shqipërisë nuk është PD

Ish-Presidenti Bujar Nishani, i cili aktualisht drejton Këshillin Kombëtar të PD, u shpreh sot në emisionin “Real Story”, se Lulzim Basha duhet të largohet si drejtues i kësaj partie pasi ka humbur 4 procese zgjedhore.

“Lulzim Basha humbi dy palë zgjedhje parlamentare dhe dy zgjedhjeve lokale. Pritshmëritë për 25 prillin ishin shumë të larta dhe në shtator PD kur të shkojë në sallën e Kuvendit do të rikthehet në situatën e shkurtit 2019, atëherë çfarë fituam në këto 18 muaj?

Basha tregoi se nuk është i aftë të fitojë zgjedhje dhe çfarë po ndodh sot, Jemin Gjana po kthehet në imazhin e PD. Po pse ne në 2025 do të shkojmë me imazhin e Gjanës?

Sot PD është një parti e rrudhur, që është larguar nga qytetari. Jemi në këtë terren, i cili nëse nuk ndryshohet nuk sjell asgjë të mirë jo vetëm për demokratët, por për të gjithë shqiptarët”, tha Nishani.

Sipas tij, PD ka një Kryesi dhe një Këshill Kombëtar, forume këto që nuk pyeten, dhe Kryetari cakton emrat për kandidatë për deputetë, dhe mendoj se kjo nuk është normale.

“Duhet një debat i gjerë lidhur me situatën e krijuar në PD, kemi nevojë për një evolucion të jashtëzakonshëm”, tha Nishani. Sipas tij, e keqja e Shqipërisë nuk është PD, por qeverisja e vendit, e cila ka shkaktuar me qindra skandale. Ish-Presidenti tha se është e pafalshme që gjatë fushatës nuk u prek fare çështja e anti-korrupsionit, ndërkohë që fenomenet korruptive në këtë vend janë alarmante.