Misteri i ekzekutimit të Bledar Birçajt, e shkuara dhe pista kryesore e hetimit/ Detajet

Bledar Birçaj, 40 vjeç, u ekzekutua me breshëri automatike, gjatë paradites së sotme në Vlorë, ndërsa policia nuk ka mundur të gjejë asnjë gjurmë të autorëve.

Birçaj u ekzekutua me armë në zonën e njohur si “Bishti i Kalldrëmit”, ndërsa ishte duke udhëtuar me makinën e tij tip “BMW” kur persona ende të paidentifikuar e qëlluan me breshëri automatiku.

Birçaj vdiq në spital prej plagëve të marra. Në makinë me Bledar Birçajn ndodhej edhe një tjetër person, i cili për fat të mirë nuk ka marrë asnjë plagë.

Ai është dëshmitari kyç i policisë për të shkuar te gjurmët e autorëve. Në momentin që autorët kanë dalë nga makina për të qëlluar me automatik ai ka dalë me vrap nga makina për tu fshehur tek garazhdi që ndodhej aty afër.

Identiteti i personit që ndodhej në makinën e biznesmenit nuk bëhet i ditur nga policia e Vlorës, ndërsa janë shoqëruar edhe disa persona të tjerë që ndodheshin në vendin e ngjarjes me shpresën se deklarimet e tyre do të hedhin më shumë dritë për ekzekutimin mafioz.

Gjithashtu një tjetër provë në dorën e hetuesve janë edhe kamerat e sigurisë së bizneseve, që mund të kenë kapur autorët dhe makinën që përdorën në momentin e vrasjes, e cila ende nuk është gjetur.

Nga raportimet mësohet se pista kryesore që po hetohet është aktiviteti i viktimës në Spanjë dhe lidhja e mundshme me drogën. Ai lëvizte shpesh në drejtim të Spanjës, ndërsa vetëm para një muaji ishte kthyer në Vlorë.

Bledar Birçaj rezulton pronari i Bar kafe “The Boss” që ndodhet në “Lungomare” në Vlorë. Lokali administrohej nga vetë ai qysh prej vitit 2017. Bledar Birçaj është një emër jo i panjohur për policinë e Vlorës, pasi në 21 dhjetor 2010 së bashku me vëllanë e tij, Elton Birçaj, kanë dhunuar barbarisht ish-juristin e hipotekës së Vlorës me inicialet F.H.

Për këtë ngjarje dy vëllezërit u proceduan në gjendje të lirë. Shkak i kësaj ngjarje ishin bërë problemet që ata kanë pasur me dokumentacionin në një pronë që ndodhet në qytetin e Vlorës. Bledar Birçaj ka qenë i arrestuar në 27 janar 2011 pasi dyshohej për një ngjarje kriminale por u lirua nga akuzuat në përfundim të hetimeve.