Ivi Kaso: PD ka mbledhur të gjitha faktet për manipulimin e zgjedhjeve, ky është një test prove për SPAK

Sekretari juridik pranë Partisë Demokratike, Ivi Kaso, i ftuar në emisionin “FrontLine”, të Maresla Karapanços në “News 24”, komentoi zhvillimet e fundit në kampin blu, e cila ka nisur një betejë ligjore për zgjedhjet e 25 prillit.

Kaso thotë se para zgjedhjeve e pas saj, në total, janë bërë 180 kallëzime në organet ligjzbatuese, e që kanë të bëjnë me fenomenin e manipulimit të votës. Kaso nënvizoi se kallëzimet e tyre janë një test prove për SPAK, në të cilën është investuar shumë dhe pritshmëria e qytetarëve është e madhe.

Sipas Kasos, PD i ka të faktuara fenomenet e shit-blerjes së votës, të siguruara nga dëshmitë e qytetarëve, por edhe burimet e Partisë Demokratike.

Ka pasur një tjetër denoncim për atë bosht të masakrës zgjedhore që e keni pagëzuar si Rama-Rakipi dhe Doshi pse jeni fokusuar në këto emra?

Ivi Kaso: Kemi filluar një proces të ethshëm denoncimesh, që janë bërë në periudhën para zgjedhore. Kanë funksionuar brenda PD informacione që kanë ardhur nga burime të shumta, nga qytetarë, që kanë denoncuar për shumë shkaqe. Ne këtë gjë nuk e kemi ndarë vetëm me publikun, por edhe institucionet ligjzbatuese.

Pse qytetarët kanë pasur besim për të denoncuar rastet tek ju, e jo në organet e drejtësisë?

Ivi Kaso: Është opozita ajo që shihet si ndryshimi në vend, e për të gjetur kurajon që qytetarët e thjeshtë se bëjnë dot për një sërë arsyesh. Ka pasur raste që janë drejtuar nga qytetarët, që para se të denonconin në polici apo prokurori, në darkë i ka shkuar personi, i ka trokitur në shtëpi dhe i ka kërkuar llogari. Ne kemi siguruar mbrojte për këto persona, por kemi marrë përsipër si partia më e madhe në vend për t’u bërë përçues i zërit të qytetarëve, e kjo është një nga ato rastet. Denoncimi i sotëm është bërë në periudhë para zgjedhore. Bëhet fjalë për fenomene të shit-blerjen e votës, që janë të faktuara edhe nga policia, e cila në vend të merrte masa, ka menduar të veprojë si organizatë partiake e duke qenë se personat në fjalë kryenin veprime të paligjshme, të armëmbajtjes pa leje, duke lëvizur me makina me xhama të zinj, i kanë dhënë bekimin për këtë aktivitet të paligjshëm. Ne këtë ia kemi kaluar SPAK-un.

Derisa keni bërë faktimin për armëmbajtje pa leje, e për të arritur deri tek telefonata me zotin Rama, si është i mundur që ju e keni siguruar telefonatën?

Ivi Kaso: Si është e mundur që kryeministri të telefonojë me armë pa leje, me lista zgjedhësish.

Ju ku e dini?

Ivi Kaso: Ta verifikojë SPAK-u. Kryeministri është më i pushtetshmi në këtë vend, të cilën e ka grumbulluar në mënyrë të paligjshme. Kjo nuk është informacion që e marrim dhe e ndajmë për efekt elektoral, sepse të ishte, e ndanim përpara zgjedhjeve. Janë më shumë se 180 kallëzime penale që i janë drejtuar organeve ligjzbatuese, nuk akuzohemi se i përdorim për efekt elektoral.

Është në provë SPAK-u?

Ivi Kaso: SPAK pati financimin e pakursyer nga buxheti i shtetit, përkrahjen e partnerëve, ajo është në një provë të madhe për t’u ngritur në pritshmëritë që qytetarët kanë. Le të japin shenjat e efiçencës së tyre. Procesi zgjedhor që është shoqëruar me parregullsi të shumta është një test i fortë prove.