Pas vdekjes tragjike të tre pjestarëve të një familje nga Gjilani, të cilët jetonin në një banesë në Gjirin e Lalëzit, janë proceduar dy mjekë të qendrës shëndetësore Manëz për ‘Mjekim të pakujdesshëm’.
Policia në njoftim thotë se Sh.B., 54 vjeç dhe J.K., 60 vjeç, banues në Durrës, me detyrë mjek në qendrën shëndetësore Manëz janë proceduar penalisht për veprën penale “Mjekim i pakujdesshëm”. Më tej policia konfirmon se tre pjestarët e familjes Haliti nga Gjilani janë helmuar nga kërpudhat që mblidhnin në pyll.
Njoftimi
Specialistët për Hetimin e Krimeve në Stacionin e Policisë Manëz, kanë proceduar penalisht për veprën penale “Mjekim i pakujdesshëm”, shtetasit Sh. B., 54 vjeç dhe J. K., 60 vjeç, banues në Durrës, me detyrë mjek në qëndrën shëndetësore Manëz, pasi si pasojë e përkeqësimit të shëndetit kanë ndërruar jetë shtetasit kosovarë E. H., 78 vjeçe, A. H., 56 vjeç dhe F. H., 57 vjeçe ( famijarë), të cilët nga hetimet paraprake dyshohet se këta shtetas kanë mbledhur kërpurdha dhe pasi i kanë konsumuar në banesën e tyre në Gjirin e Lalëzit janë helmuar.
Materialet i kaluan Prokurorisë së Rrethit Gjyqësor Durrës, për veprime të mëtejshme.
