Liverpool mposhti 2-0 në “Anfield” Southampton dhe rikthehet te fitorja, pas dy barazimeve radhazi në kampionat.
Vendi i gjashtë në renditje me 57 pikë për ekipin e Klopp, gjashtë më pak se Leicester City i vendit të katërt, që ka luajtur një takim më shumë.
Goli i parë i sfidës erdhi pas gjysmë ore lojë. Kros i Momo Salah, “fluturim” në ajër i sulmuesit Sadio Mane dhe topi në rrjetë. Goli nëntë sezonal në Premier League për senegalezin, teksa fitorja u vulos nga goli i mesfushorit Thiago Alcantara.
Lojtari spanjoll dërgoi topin në rrjetë me një goditje të bukur në minutën e fundit pas një asisti të marrë nga Roberto Firminho. Liverpool ia doli të menaxhojë mirë avantazhin dhe në fund festoi triumfin e nevojshëm për objektivin Champions League.
