Gjykata e Elbasanit ka vendosur “Arrest me burg” për ish-policin Koço Buzo i cili qëlloi për vdekje me armë zjarri dy ditë më parë bashkëshorten e tij Liljana Buzo, 54 vjeçe, ndërsa plagosi edhe dy persona të tjerë.
Prokurori Petref Asllani kërkoi masën arrest me burg dhe këtë masë la në fuqi edhe gjyqtari Bujar Musta. Avokati i të pandehurit e ka pranuar masën e dhënë nga Gjykata duke e cilësuar mjaft të rëndë krimin e kryer nga klienti i tij.
Ai ka theksuar se klienti i tij e ka kryer krimin në një moment të rënduar psikologjik, pasi nga koha kur gruaja i kishte thënë që do të divorcohej e kishte përjetuar mjaft keq.
Ndërkohë vetë, autori pak ka folur para oficerëve gjyqësorë. Ai ka theksuar se nuk mban mend asgjë, se nuk ka qenë ai që ka kryer krimin, pasi. “Në atë kohë isha në shtëpi, ndërsa gruan e kam në Tiranë pasi kam 6 muaj që nuk flas”, raportohet të jetë shprehur.
Ndërsa vrasjen, tha se e ka marrë vesh nga shokët në polici, por shton se ai nuk mban mend asgjë. Armën e kam pas në shtëpi që në vitin 97, ka thënë më tej.
Në gjendje të rëndë për ngjarjen e ndodhur, edhe në dëshminë e parë në polici, ai ka qenë i kursyer në deklarata, teksa ka theksuar se “i pata thënë që nuk ke për tu ndarë prej meje, por ajo donte të më fuste në burg, pasi unë isha xheloz”.
Seanca u zhvillua me dyer të mbyllura, sikurse e parashikon ligji për raste të tilla, që kanë të bëjnë me konflikte familjare.
Vrasja ndodhi më 6 maj pranë Gjykatës së Elbasanit, ku do të vendosej për divorcin e çiftit që kishte prej vitesh konflikte. Ngjarja mund të kishte qenë edhe më tragjike nëse një qytetar i cili bëri të mundur neutralizimin e autorit nuk do të kishte ndërhyrë.
Viktima Liljana Buzo ishte larguar që nga fillimi i këtij viti nga shtëpia, dyshohet për shkak të dhunës së vazhdueshme psikologjike e fizike të ushtruar nga bashkëshorti i saj, Koço Buzo. Dyshohet se dhuna disa vjeçare ndaj saj ishte ushtruar në sy të fëmijëve, ndërsa gjendja e autorit raportohet se ishte rënduar edhe më shumë pas vdekjes së djalit pak vite më parë.
