Nga BoldNews.al
Operacioni policor i zhvilluar në 10 Prill 2021, ku u zbuluan mbi 140 kilogramë kokainë në një kontenier bananesh në Portin e Durrësit, me shumë mundësi është iniciuar nga një sinjalizim i autoriteteve të huaja.
Burime nga grupi hetimor deklarojnë për “Boldnews.al” se Policia kishte marrë informacion të sigurt nga agjencitë partnere se në një prej kontenierëve me banane të porositur nga ‘Masabi Fruit” gjendej një sasi e konsiderueshme lënde narkotike.
Megjithatë, këto detaje nuk zbardhen në vendimin e gjykatës së Durrësit, në bazë të të cilit është caktuar masa e sigurimit arrest me burg për pronarët e kompanisë së bananeve, Erjon Peti dhe Klajdi Xibraku.
Sipas gjykatës, droga është zbuluar në bazë të një kontrolli rutinor në kontenierët e transportit të bananeve që vinin nga Ekuadori.
Prokuroria e Durrësit i ka paraqitur detajet para trupës gjykuese, duke renditur në mënyrë kronologjike veprimet proceduriale.
Në bazë të hetimit rezulton se skaneri i Doganës së Durrësit ka identifikuar një detaj të dyshimtë në një prej kontenierëve të porositur nga “Masabi fruit”.
Pas marrjes së informacionit, si edhe praktikës së skanerit, është mbledhur njësia e kontenierëve dhe është marrë kontakt me agjentin doganor dhe subjektin tregtar, me qëllim ushtrimin e kontrollit në këtë kontenier.
Me paraqitjen e shtetasit Klajdi Xibraku, si administrator i subjektit “Masabi Fruit” dhe agjentit doganor, është vijuar me kontrollin e kontenierit, ku fillimisht është shkarkuar një pjesë e ngarkesës me banana në vendin ku ishte markuar me shenjën RED (të kuqe) nga skaneri.
Pas kontrollit fizik të pjesës së brendshme të kontenierit dhe ngarkesës me banane, nuk u konstatua ndonjë send apo lëndë e jashtëligjshme.
Nisur nga dyshimet, kontrolli ka vijuar në pjesën e sipërme të kontenierit nga pjesa e jashtme, ku në sipërfaqe u konstatua se llamarina që mbulon kontinierin ishte e deformuar dhe dalloheshin lehtë saldimet që janë bërë në të.
Gjatë procedurës së kontrollit u bë hapja e një pjese të llamarinës dhe u pa se në hapësirën midis pjesës së poshtme dhe mbulesës së sipërme gjendeshin pako të mbështjella me natriban ngjyrë kafe, të cilat kanë brenda material pluhuri të dyshuar me lëndë narkotike e llojit kokainë.
Nga peshimi i ngarkesës së plotë, rezultoi se ishin 143 kilogramë kokainë, e ndarë në 120 pako të vogla, me peshë nga 1 deri në 1.2 kilogramë secila
Pas këtij operacioni, Policia arrestoi dy administratorët e “Masabi Fruit”, Erjon Peti dhe Klajdi Xibraku, të cilët dyshohen për veprën penale të “Trafikut të narkotikëve”.
Dy të dyshuarit e kanë mohuar lidhjen me ngarkesën e kokainës. Megjithatë, ata vijojnë të qëndrojnë në arrest, deri në përfundim të hetimeve.
