Partizani udhëton në Korçë, ja si pritet të rreshtohen të kuqtë kundër Skënderbeut

Partizani nis sprintin final drejt titullit kampion në një transfertë shumë të vështirë në Korçë, përballë Skënderbeut.

Daja ka një bilanc jo shumë të mirë në sfidat kundër Skënderbeut. Duelin e parë kundër korçarëve, Daja e ka pasur kur ishte në krye të Besës, në vitin 2012.

Në atë duel trajneri kryeqytetas mori një barazim 1-1. Më pas, Daja mori drejtimin e Tiranës duke u ndeshur 3 herë kundër Skënderbeut. Në këto tri sfida, Daja pësoi dy humbje dhe fitoi një ndeshje. Në krye të Flamurtarit, strategu 54-vjeçar ka një bilanc edhe më negativ.

Në 4 sfida kundër ekipit korçar, Daja dhe ekipi i tij u mposhtën 3 herë, duke fituar vetëm 1 takim. Ndërsa në krye të Partizanit, Daja ka rregulluar disi bilancin kundër Skënderbeut duke marrë 2 fitore dhe vetëm 1 humbje. Në total, Daja ka zhvilluar 11 ndeshje kundër Skënderbeut, me këtë bilanc: 4 fitore, 1 barazim dhe 6 humbje. Ndërsa sa i takon golavarazhit, është i barabartë, 12-12.

Ilir Daja duhet të bëjë pa dy titullarë kundër Skënderbeut. Kartonët e verdhë të marrë në sfidën me Apoloninë, kanë bërë që Mala dhe Bardhi të plotësojnë numrin katër të tillëve duke qenë mungesa të sigurta në këtë transfertë tepër të vështirë. Në duelin kundër Skënderbeut pritet të jetë titullar afrimi i bujshëm i janarit, Ferhan Hasani. Fantazisti ka marrë gradualisht minuta në fushë me të kuqtë duke “ndezur motorët” për të qenë nga minuta e parë.

Formacioni i mundshëm i Partizanit: Hoxha, Idrizaj, Bitri, Belica, Hakaj, Murataj, Broja, Hasani, Asani, Junior, Cinari