Ish-polici vret gruan me armë zjarri në Elbasan, plagosen 2 persona(VIDEO)

Një burrë ka vrarë me armë zjarri bashkëshorten këtë të Enjte në Elbasan.

Koço Buzo, ish-polici, ka qëlluar bashkëshorten në rrugë, pranë gjykatës, duke e lënë të vdekur. Raportohet se çifti ishte në proces divorci.

Nga të shtënat janë plagosur edhe dy persona, një prej të cilëve raportohet se ishte  avokati i gruas.

Autori, ndërkohë, është arrestuar nga policia.

“Rreth orës 12:15, në afërsi të Gjykatës, shtetasi Koço Buzo, 58 vjeç, ka qëlluar me armë zjarri në drejtim të bashkëshortes së tij, shtetases Liljana Buzo, 54 vjeçe, e cila si pasojë e plagëve të marra ka ndërruar jetë gjatë rrugës për në spital”, njoftoi policia.

“Si pasojë e të shtënave është plagosur në këmbë edhe një kalimtar i rastit, shtetasi G.T., i cili ndodhet në spital, jashtë rrezikut për jetën. Gjithashtu është paraqitur në spital, i dëmtuar në dorë, edhe shtetasi A.K., i cili pasi ka marrë ndihmën mjekësore është larguar për në banesë”, shtuan të njëjtat burime.

“Ndërhyrja në kohë e shërbimeve të Policisë ka bërë të mundur kapjen dhe prangosjen e autorit, sekuestrimin e armës së zjarrit tip kallashnikov dhe të një arme të ftohtë thikë. Në vendngjarje ndodhet grupi hetimor dhe nën drejtimin e Prokurorisë vijon puna për zbardhjen e rrethanave të ngjarjes”, thuhet më tej në njoftimin e policisë.