Shefja e Epidemiologjisë në ISHP, Silva Bino, pohoi sot se disa persona janë infektuar me Covid-19 pas marrjes së vaksinës, por nuk ka pasur shtrime në spital të këtyre personave. Ajo tha se ka pasur raste të infektimeve me shenja të lehta.
“Flasim për të gjitha llojet e vaksinave që janë bërë në vendin tonë.
Sa i takon mutacionit indian nuk mund të themi ende se ai është shkak i numrit të madh të infektimit në këtë vend, pasi mund të jetë dhe pasojë e qarkullimit të variantit britanik. India është një shtet me një numër të lartë banorësh, dhe me shtrirje shumë të gjerë”, tha ajo.
Gjatë mbledhjes së Komisionit Teknik të Ekspertëve, Bino foli mbi rënien e incidencës së infektimeve në vend. Teksa theksoi rënien e ndjeshme të kurbës së infektimeve në shumicën e Bashkive të mëdha, Bino theksoi se Bashkitë e Kukësit dhe Lezhës janë dy bashkitë e mëdha ku incidenca e infektimeve vijon të mbetet e lartë.
Gjithashtu shefja e epidemiologjisë njoftoi se grafiku i vaksinimeve dhe ecuria e injektimeve në popullatë është arsyeja e rënies së incidencës së vdekjeve në grupmoshat mbi 60 vjeç.
“Unë dua të them është se aktualisht të gjitha bashkitë e mëdha kanë një rënie të incidencës, përveç Bashkisë së Kukësit dhe të Lezhës. Gjatë gjithë kohës së pandemisë ne nuk kemi patur një incidencë kaq të ulët të pandemisë në vend. Ajo që është më e rëndësishme është ulja e incidencës së vdekjeve, megjithëse vijojmë ende të kemi persona të cilët po humbasin jetën si dhe vijojmë të kemi persona të shtruar në spital. Duke patur parasysh që vdekjet më të larta janë mbi personat mb 60-vjeç dhe nëse shohim grafikun vaksinimi ka një impakt të mirë në uljen e rasteve të vdekjes në këtë grup moshë. Deri në fund të vitit ne do të kemi një shtrirje tepër të madhe të vaksinimit. Përqindja e përhapjes së vaksimit ka filluar të matet dhe Gjirokastra është qarku me numrin më të lartë të vaksiinimeve, kjo lidhet dhe me moshën e lartë të popullatës në këto zona. Vaksinimi po ecën me ritme të shpejta dhe strategjia që kemi ndjekur nga Britana e Madhe është një strategji e cila ka sukses”, tha Bino.