Aktori i njohur, Guliem Radoja, ndodhet në gjendje të rëndë shëndetësore në spitalin “Shefqet Ndroqi”, si pasojë e Covid-19.
Mbrëmjen e së hënës ai është transportuar në gjendje të intubuar nga spitali i Durrësit.
Para dy javësh ai u shtrua në spitalin e Durrësit, ku po trajtohej për virusin. Nga raportimet mësohet se gjendja shëndetësore e aktorit të njohur shqiptar është e rëndë, pasi virusi i ka prekur mushkëritë në masën 100 %.
Gjithashtu raportohet se Radoja vuan edhe nga sëmundje kardiake, çka e rëndon edhe më shumë gjendjen shëndetësore.
Gjatë trajtimit në Durrës, kolegë dhe miq i bënë apel shtetit, që aktori të dërgohej jashtë për një trajtim më të specializuar. Por, gjendja e tij nuk e lejon atë aktualisht. Megjithatë reanimatorët e “Shefqet Ndroqit”, ende shpresojnë që aktori mund t’ia dalë.
