Partia Socialiste ka konkretizuar nismën për shkarkimin e Ilir Metës nga posti i Presidentit. Kërkesa është firmosur nga 50 deputetë, një pjesë e të cilëve nuk do të jenë më pjesë e Parlamentit të dalë nga zgjedhjet e 25 prillit, për shkak ose të moskandidimit ose të mos marrjes së mandatit të deputetit.
Socialistët pretendojnë se Presidenti Meta ka kryer shkelje të Kushtetutës, para dhe gjatë fushatës zgjedhore.
Sot paradite u mblodh Konferenca e Kryetarëve ku u vendos që kërkesa të hyjë në kalendarin e punës së Kuvendit si dhe vendosi zhvillimin e seancave plenare në datat 4 maj, 6 maj, 13 maj dhe 20 maj 2021.
Në kërkesë thuhet se nisma vjen me qëllimin e sigurimit të besueshmërisë së popullit te roli i kreut të Shtetit si një nevojë e shteti të së Drejtës. Socialistët që kanë frimosur shprehen se janë të bindur se Presidenti Ilir Meta gjatë periudhës para dhe gjatë fushatës zgjedhore 2021 ka shkelur rëndë dhe në mënyrë flagrante Kushtetutën.
Në dokument thuhet se Ilir Meta ka cënuar ndjeshëm besueshmërinë e qytetarëve tek roli i Presidentit dhe nuk e ka ushtruar detyrën e tij në përputhje me Kushtetutën.
DENONCO