Policia e Sarandës ka zhvilluar një operacion të përbashkët me IKMT duke arrestuar dy persona, të cilët akuzohen se në mënyre të kundërligjshme, kishin mbushur një pjesë ujore në bregun e detit në lagjen nr. 4 Sarandë, me qëllim ndërtimin e një moli.
Ata akuzohen për veprën penale “Ndërtimi i paligjshëm”.
“Nga denoncimet e bëra nga qytetarët se dy shtetas po mbushnin hapësirën ujore në afërsi në bregut të detit, duke hedhur inerte në mënyrë të kundërligjshme, policia ka bërë të mundur arrestimin në flagrancë të shtetasve: F. M., 40 vjeç dhe I. B., 56 vjeç, banues në lagjen nr. 3, Sarandë”, njoftoi policia.
Nga veprimet e para hetimore rezultoi se shtetasi F. M. kishte marrë një kamion që drejtohej nga shtetasi I.B. dhe nëpërmjet tij po mbushte një hapësirë ujore në afërsi të bregut të detit, me qëllim ndërtimin e një moli, shtuan të njëjtat burime.
