Përditësuar/ Misioni i vëzhgimit të zgjedhjeve nga OSBE/ODHIR dënoi skandalin e “patronazhistëve” nga Partia Socialiste.
Një përfaqësues i ODHIR, tha një deklaratë për mediat se “të dhënat që janë publikuar, patjetër që përbëjnë problem thyerje privatësie dhe konfidecialiteti dhe pikë shqetësuese që vlen për tu përmendur”.
“Vota duhet të mbetet e fshehtë ndaj çdo rrjedhje informacioni që tregon se si do votojë qytetari e vë në kërcënim qytetarin. Dhe kjo është një kërcënim për demokracinë dhe për një votim normal. Në këtë mënyrë demokracia mund të vihet në rrezik”, u shpreh një tjetër përfaqësues i misionit vëzhgues.
Elbasani
“Dënojmë incidentin e dhunshëm në Elbasan ku një person u vra dhe katër u plagosën. Incident që ndikoi negativisht, incidenti duhet të hetohet, dhuna s’duhet të tolerohet, por dënohet”, tha përfaqësuesi i ODHIR.
“Në përfundim nga ana jonë them që do vazhdojmë të monitorojmë. Gjithçka duhet të bëhet në interes të shqiptarëve”, apeloi ai.
Shit-blerja e votës
Një tjetër përfaqësues vuri theksin te problematika e shit-blerjes së votës. “Pretendimet për shit-blerjen e votës ishin në fokus të fushatës, duke treguar se kjo është akoma problem”, tha ai.
Ndërsa, kryetarja e misionit të ODIHR, Ursula Gacek, u shpreh: “Kemi pasur raporte lidhur me këtë. Vëzhguesit tanë afatgjatë janë marrë me këto çështje. Është e vështirë t’i gjurmosh çështje të tilla. SPAK ka raste, të cilat po i ndjek, që kanë të bëjnë me akuza për shit-blerjen, pavarësisht përpjekjeve të mëdha që janë bërë nga KQZ. Ne inkurajojmë njerëzit të mos humbasin të drejtën për të votuar, ne vazhdojmë të shohim shembuj apo akuza të shit-blerjes së votave. Është e rëndësishme që votuesit të kenë besim në sistemin zgjedhor. Shit-blerja e votave mbetet problem dhe patjetër që duhet luftuar. Nuk duhet lejuar dhe nuk do të lejohet. Kjo bën që shqiptarët të humbin besimin në zgjedhje”.
Fushata elektorale
Lidhur me fushatën elektorale, u shpreh se “nuk pati dinamikën e duhur, sepse mesazhet e fokusuan te liderët e partive, dhe jo te programet”.
