Nga BoldNews.al
Partia Social-Demokrate e Tom Doshit duket se ka sjellë një “surprizë” aspak normale, ndërkohë që deri paraditen e së Hënës janë numëruar rreth 25 përqind të votave të zgjedhjeve të përgjithshme të 25 Prillit.
Doshi ka arritur, për herë të parë në historinë e drejtimit të tij të social-demokratëve, që të fitojë një mandat deputeti në Tiranë, ndërkohë që subjekti i tij politik ka pasur një qasje lokaliste, e përqëndruar vetëm në zonën e tij të Mbi-Shkodrës, ku ka rikonfirmuar pozicionin e mëparshëm.
Partia Social-demokrate nuk ka asnjë program të qartë elektoral. Ky subjekt zgjedhor nuk ka asnjë ekip që mund të trondisë terrenin politik në Shqipëri.
Gjithë e gjithë, PSD ka vetëm Tom Doshin, një individ të ndaluar për të hyrë në Shtetet e Bashkuara të Amerikës për shkak se konsiderohet si “rrezik serioz” për atë vend dhe që ambasadorja Yuri Kim tentoi pa sukses për të bindur autoritetet shqiptare që ta nxirrnin jashtë garës elektorale.
Atëherë, pa një program, pa një ekip dhe me një drejtues të dyshuar për “korrupsion madhor”, fitorja e një mandati në Tiranë prej tij, rrjedhimisht krijon dyshime se gjithçka mund të jetë rezultat i një procesi para-zgjedhor aspak demokratik.
Ka pasur raportime se grupime të Tom Doshit janë shpërndarë nëpër zona të caktuara të Tiranës, për të joshur me mënyra jo-demokratike qytetarë për të votuar në favor të tij.
Ka pasur raportime, madje edhe nga ato që duken çudira- pranë qendrës së Tiranës, në një ambjent tregtar, janë shpërndarë ndihma për qytetarët, për të cilat është thënë se janë “dhurata” nga një fondacion fetar. Një ditë më pas, ky ambjent tregtar është branduar me logon e partisë së Tom Doshit.
Megjithatë, të gjitha këto të dhëna kanë mbetur në kuadrin e raportimeve, pa u shoqëruar me prova publike dhe mediatike.
Raportimet për Doshin i bashkohen raportimeve në të gjithë Shqipërinë për blerje dhe joshje votuesish nga Partia Socialiste në pushtet.
Dhjetra kallëzime për çështje të tilla janë depozituar pranë prokurorisë speciale, SPAK, ndërkohë që qytetarë në të katër cepat e vendit kanë njoftuar për shpërndarjen e grupeve elektorale të qeverisë, që joshnin qytetarët me kartëmonedha dhe qese me ushqime.
