Në Shqipëri mbahen sot zgjedhjet e përgjithshme parlamentare, ndërsa qendrat e votimit hapen në orën 07:00. Në këto zgjedhje Partia Socialiste kërkon një mandat të tretë rradhazi, gjë që nuk ka ndodhur kurrë më parë, ndërsa opozita, e përbërë nga Partia Demokratike, e cila drejton koalicionin Aleanca për Ndryshim, si dhe LSI kërkojnë të marrin drejtimin e vendit për 4 vitet e ardhshme.
Në garë janë futur edhe disa parti të reja, si Nisma Thurje, Lëvizja për Ndryshim e Jozefina Topallit dhe Bindja Demokratike e Astrit Patozit. Ndërsa Lëvizja Vetëvendosje përfaqësohet me 3 kandidatë, por që garojnë si të pavarur.
Këto zgjedhje parlamentare kanë tre risi. Dy lidhen me teknologjinë, ku për herë të parë do të bëhet identifikimi elektronik i zgjedhësve, dhe votimi e numërimi elektronik në një njësi të Tiranës. Risia e tretë është lista e hapur ku qytetarët krahas partisë, mund të shprehin preferencë edhe për një kandidatët për deputet.
Fushata është karanterizuar nga incidente dhe akuza të shumta, veçanërisht në ditët e fundit, për shit-blerje votash.
Votuesit që u drejtohen sot qendrave të votimit duhet të kenë parasysh edhe masat anti-covid. Maskat, dezinfektantët dhe ruajtja e distancës janë disa prej elementëve thelbësore, ndërsa duhet të shmangen grumbullimet brenda dhe jashtë qendrave të votimit.
Policia e Shtetit ka angazhuar mbi 7500 efektivë për të gjitha qendrat e votimit dhe Komisionet Zonale të Administrimit Zgjedhor në vend për këtë ditë. Sipas drejtorit të rendit dhe sigurisë publike, Ylli Vasili, në total janë trajnuar efektivë të të gjitha niveleve, më së shumti të policisë kriminale për personat e shpallur në kërkim.
ODIHR kishte parashikuar të sillonte në Shqipëri 250 vëzhgues afatshkurtër, numër i cili u shkurtua për shkak të pandemisë. Masat kufizuese në shtete të ndryshme ka bërë që ODIHR të krijojë një mision vëzhgimi ndryshe nga zgjedhjet e shkuara. Në mbështetje të tyre do të shkojnë përfaqësuesit e selive diplomatike në Shqipëri.
