Presidenti Ilir Meta u shpreh sot në një konferencë të jashtëzakonshme për mediat se 48 orët në vijim janë kritike për 100 vitet e ardhshme.
Meta tha se krimi zgjedhor është një kërcënim për ditën e zgjedhjeve, ndërsa i drejtoi një apel të fortë institucioneve ligjzbatuese që të parandalojnë çdo tentativë që cënojnë zgjedhjet e qeta dhe demokratike.
Presidenti kërkoi zbardhjen në mënyrë urgjente të ngjarjes së ndodhur në Elbasan, ndërsa u shpreh se duket se Prokuroria dhe Policia po zvarrisin hetimet duke e lënë pas zgjedhjeve zbardhjen e saj.
Meta tha se megjithëse kanë kaluar 72 orë nga ngjarja e Elbasanit, ku fatkeqësisht pati një viktimë dhe disa të plagosur, Policia dhe Prokuroria nuk kanë dhënë asnjë reagim zyrtar të ngjarjes.
Presidenti kërkoi nga organet ligjzbatuese që të zbardhin urgjentisht ngjarjen e rëndë, ndërsa u shpreh se SPAK duhet të nisë hetimet pasi në këtë ngjarje tragjike mund të jenë përfshirë edhe zyrtarë apo kandidatë për deputet.
“Prokurori i Përgjithshëm dhe drejtuesi i SPAK duhet të japë menjëherë përgjigje për të gjitha pyetjet dhe dyshimet lidhur me ngjarjen. Çdokush që ka shkelur ligjin duhet të dënohet sot dhe jo nesër apo pasnesër”, tha Meta.
Presidenti tha se ngjarja e Elbasanit e 21 prillit ka lidhje me denoncimin në SPAK të datës 7 prill, ku Sekretari i Përgjithshëm i PD, Gazment Bardhi, denoncoi rreth 40 emra të personave që ishin duke kryer krime zgjedhore. Meta tha se janë të njëjtat emra që rezultojnë të përfshirë edhe në ngjarjen e 21 prillit, ndodhen edhe në kallëzimin penal të depozituar në SPAK.
Meta akuzoi SPAK se nuk ka vepruar duke e përcjellë denoncimin në Prokurorinë e Elbasanit, më datën 15 prill, ndërsa kjo e fundit e regjistroi në datën 19 prill. Presidenti tha se nëse SPAK dhe prokuroria e Elbasanit do të hetonin në kohë denoncimin e PD, do të shmangej ngjarja e rëndë e 21 prillit.
