Kryeministri Edi Rama u shpreh mbrëmjen e sotme në “Opinion” se nëse humbet zgjedhjet më 25 prill atëherë do të largohet si Kryetar i PS-së. Por gjithashtu, Rama tha se nuk do të bënte një Qeveri nga halli.
“Nëse nuk kam mandatin e qartë, pra nuk do të kem 71 votat, unë nuk jam, largohem, pasi nuk do të bëj një Qeveri nga halli”, tha Rama.
Ndërkohë lidhur me ftesën drejtuar Lulzim Bashës, Kryeministri tha se nuk ka kushte.
“Do shikojmë si do të shkojnë zhvillimet në PD, e cila do të humbë më 25 prill. Do të shikojmë nëse Lulzim Basha do të vijojë të jetë Kryetar i PD apo do të largohet me një sms nga Sali Berisha”, u shpreh Rama, i cili u shpreh se ftesa ndaj Bashës nuk ka kushte dhe as limite.
“Shpresoj që PD do të reflektoj më në fund lidhur me vetveten e të kuptoj që biem ti biem në një vrimë dhe nga vrima del dhe gryka e pushkës vret dhe njerëz, nuk të çon asgjëkund jo më në pushtet. Do te jetë hapur për të ndërtuar një proces bashkëpunimi.
Bashkëqeverisja mes qeverisë dhe opozitës nuk do të thotë të dyja palët në qeveri. Por të ndërtohet një frymë bashkëpunimi, shqiptarëve duhet tu japim arsye të energjizohen me gjëra që bëjmë, e jo tu japim arsye që të thonë mbyll televizorin. Pastaj vendosen piketat se ku duhet të vendosim forcat bashkë për reformat në funksion të shtetit”, tha Rama.
