Partia Demokratike deklaron se sulmuesit e djeshëm të zyrës elektorale të PD në Kavajë, ku u plagos me armë sekretari i kësaj force politike, “janë njerëzit e Edi Ramës dhe kanë vepruar me qëllim”.
“Edi Rama merret me gënjeshtra dhe manipulime ndërkohë që dhunuesit nuk janë arrestuar akoma! Asnjë gënjeshtër nuk e ndihmon dot Ramën, sepse të gjitha faktet dëshmojnë se sulmuesit e djeshëm janë njerëzit e tij dhe kanë vepruar me qëllim. Ky është një sulm kriminal kundër demokracisë sonë nga një njeri që tashmë e di se do t’i humbe zgjedhjet. Të Dielën ne do të fitojmë dhe do të sjellim ndryshimin, për të cilin Shqipëria ka nevojë”, thuhet në një reagim të PD-së.
Partia Demokratike publikon dhe një fotografi të tre personave të shpallur në kërkim policor lidhur me ngjarjen, ku shihen ulur rreth një tavoline restoranti, bashkë me kryebashkiakun e Kavajës Rredian Krali.
Më herët, për ngjarjen reagoi kryeministri Edi Rama, si dhe personi që kreu plagosjen, Ndriçim Jonuzi. Të dy deklaruan se ngjarja s’ka lidhje politike. Nga ana tjetër, PD këmbëngul për të kundërtën.
