Skënderbeu-Tirana ndahen në paqe, Shehi: Fjala titull ka ngarkuar skuadrën

Tirana u ndal në një barazim 0-0 në Korçë me Skënderbeun. Trajneri Orges Shehi analizoi paraqitjen e skuadrës së tij, ndërsa në emisionin “Gol pas Goli” në Supersport tha se nuk jemi të kënaqur me rezultatin, por futbolli i tillë është. Duhet pranuar, por jo në vazhdim.

“Kemi tentuar të luajmë poshtë, shpejt, vertikal dhe me rrjedhshmëri. Kur luan me skuadra në mbrojtje është e vështirë. Ndoshta duhet të ishim pak më konkretë te rastet që krijuam. Mund të bënim më mirë, por është e vështirë me rivalë që rrinë në mbrojtje”, shtoi Shehi.

“Ndoshta lojtarët u ngarkuan disi më shumë, kur përmendet titulli. Jam i mendimit që ishim më të ngarkuar dhe kjo na bëri konfuz për të mos i zgjidhur mirë rastet që na u paraqitën”, shtoi trajner Shehi në deklaratën e tij pas ndeshjes.

LEXO EDHE  Nga sherri me rusët te arrestimi në Austri, si ka rrjedhur jeta e kampionit Florian Markut

“Gjatë gjithë javës jemi munduar të luajmë nga krahët. Thellësinë e kemi marrë pak, pasi kundërshtari tërhiqet shumë. Në qendër nuk ka rrezikshmëri. Ata ashtu duan, të rikuperojë dhe në nisen në kundërsulm. Kur kalojnë minutat edhe qartësia mungon pak”.

“Nuk më pëlqen të luaj me topa të gjatë dhe krosime. Jam dakord që objektivat janë madhore, por në një ndeshje në orën 13:00 lojtarët karikohen më shumë dhe frenohen. Normalisht në një klub të tillë objektivat janë të tilla”, përfundoi Shehi.