Kategoria Superiore/ Teuta merr kreun e vetme, supersfida Laçi-Vllaznia mbyllet pa gola

Teuta ka mposhtur 0-2 në transfertë Apoloninë për të marrë kreun e vetme. “Djemtë e Detit” përfituan nga barazimi pa gola i Laçit dhe Vllaznisë, ndërsa tashmë kryesojnë Superioren në kuotën e 49 pikëve, 2 më shumë se Vllaznia e vendit të dytë.

Në sfidën e luajtur në Fier, Durrsakët e zhbllokuan ndeshjen 20 minuta nga fillimi i ndeshjes, me Lorenco Vilën që nuk fali me një goditje të lehtë brenda zonës.

Teuta komandoi lojën, ndaj një Apolonie që tani po e pranon gradualisht se shpresat për të mbijetuar janë thuajse zero. Dejvi Bregu, në formë javët e fundit, u dha një tjetër goditje fierakëve dhe i çoi shifrat në 0-2. Mjaftuan dy gola dhe Teuta mori tre pikët.

LEXO EDHE  Teutës nuk i lejohet të luajë në “Niko Dovana”, ndryshon stadiumi për në Conference League

Superfida mes Laçit dhe Vllaznisë u karakterizua nga një lojë e fortë ndërsa rastet për shënim nuk munguan. Ishin shkodranët ata që e nisën më mire të cilët me anë të Cisse që në minutën e dytë iu afruan golit, ndërkohë që rrezikoi më pas edhe Adili.

Kurbinasit nisën të reagojnë gradualisht dhe Harmon ishte i rrezikshëm për Laçin. Në fund të pjesës së parë Zogovic e ndali, kurse në të dytën sulmuesi i fali nga shumë pranë portës.

Shumë luftë sportive në Laç, faulle dhe tentativa për të shënuar. Asnjëra skuadër nuk ia ka dalë dot dhe Vllaznia mori pikën që deshi në transfertë dhe renditet me dy pikë pas Teutës.