Karriera sportive e Lance Armstrong ka patur një zhvillim plotësisht për t’u shkruajtur në librat e historisë, arriti të kapë qiellin ndërsa më vonë përfundoi në “ferr”.
7 herë fituesi I Tour De France kaloi edhe probleme shëndetësore të mëdha(mposhti kancerin në testikuj), triumfoi kudo në garat më të rëndësishme dhe më pas u shpall si një nga mashtrimet më të mëdha në botën e çiklizmit kur u zbulua edhe sistemi shumë i sofistikuar i dopingut që ai përdorte.
Nuk mjafton me kaq sepse tani kanë dale në dritë një sere akuzash të tjera, jo doping biologjik por mekanik nga ish kreu i Agjencisë Franceze të Anti-dopingut, Jean-Pierre Verdy i cili në librin e tij e akuzon Armstrong se ka përdorur motor të vegjël të integruar në biçkletën e tij në Tour De France.
“Lance Armstrong është mashtrimi më i madh, me bashkëpunim në të gjitha nivelet. Ai mori një trajtim të veçantë, shumë më paralajmëruan që nuk duhet t’i afrohesha legjendave, se do ta gjeja veten vetëm dhe ashtu ndodhi. Ai nuk pati vetëm doping të sofistikuar, unë besoj se ai kishte një motor në biçikletë. Unë ende i kam në kokën time imazhet e një skene mali ku ai i la të gjithë në tokë dhe u shkëput në mënyrë të habitshme. Në fund të etapës, thirra të gjithë specialistët që njoh dhe ata nuk e kuptuan se si është e mundur të performosh, edhe me substancë të ndaluar si EPO nuk ishte e mundur ajo. Diçka nuk ishte në rregull dhe të gjithë specialistët më thanë të njëjtën gjë. Nuk ishte EPO që bëri ndryshimin” deklaroi me bindje ish kreu i antidopingut francez.
Përfshirja e motorëve të vegjël në biçikletë është tashmë një problem i madh për çiklizmin profesionist dhe prej kohësh po luftohet por në kohën e Armstrong nuk ishte ende i qartë një mekanizëm i tillë ndaj dhe tani po dalin në skenë prova të reja që implikojnë amerikanin i cili mbart mbi vete një histori plot me sukses, zhgënjime dhe akuza për manipulime të tmerrshme si biologjike ashtu edhe mekanike.
