Në vijim të turit elektoral për zgjedhjet e 25 prillit, kryetari i PDIU, Shpëtim Idrizi zhvilloi një takim me qytetarët e Lushnjes të cilëve iu theksoi se “në demokraci, rotacioni, ndryshimi i elitave është gjëja më normale.
Ai tha se është shumë normale për një njeri që ka 8 vjet, sidomos në 4 vitet e fundit që ka krijuar probleme shumë të mëdha në varfërinë, pensione, largimin e të rinjve – të ndryshojë pushteti dhe ne nuk jemi duke hequr nga pushteti George Washingtonin, por jemi duke hequr Edi Ramën.
Idrizi e vuri theksin pikërisht te varfëria që ka pllakosur vendin, mungesa e vendeve të punës dhe emigracioni masiv, ku vetëm 4 vitet e fundit janë larguar nga Shqipëria 450 mijë qytetarë. Sipas tij, më shumë se gjysma e popullsisë jeton në kufijtë e minimumit jetik, prej vetë 4 dollarë në ditë.
“Sot çdo shqiptar, ju e shihni edhe këtu në Lushnje, ka probleme shumë të mëdha të vafërisë. Sot 60% e shqiptarëve jetojnë me 4 USD në ditë. Ne jemi në këtë aleancë për të gjithë ata burra e gra që nuk e dinë si do ta shtyjnë të nesërmen. Për të gjithë ata djem të cilët duan që pas 25 prillit të jeotjnë në Shqipëri dhe të mos u japim si mundësi të vetme largimin nga Shqipëria. Jemi bashkuar për ata pensionistë që marrin pension qesharak dhe nuk iu del për të paguar dritat, ujin dhe ilaçet. Ne nuk kemi pasur asnjëherë një shtet që të funksionojë. Jemi në krizë shumë të madhe ekonomike, sociale, politike, por edhe demografike.
Janë 450 mijë shqiptarë që kanë ikur vetëm në 4 vitet e fundit nga mungesa e shpresës, ndërkohë që ky kryeministër do t’i zëvendësojë me punëtorë nga Bangladeshi apo Pakistani. Ne jemi në një aleancë të madhe të të gjithë shqiptarëve, kundër një njeriu të vetëm i cili sot i ka kapur të gjithë pushtet në një dorë dhe të gjithë ekonominë për 5 shokët, miqtë, klientët e tij”, u shpreh Idrizi.
Shqiptarët sot, tha kreu i PDIU nuk e kanë pasur asnjëherë shtetin kur kanë pasur nevojë, miliona euro do të paguhen nga taksat e qytetarëve në arbitrazh, ndërsa shtoi se kriza e aeroportit të Rinasit, dëshmon më shumë se kurrë dështimin e funksionimit të shtetit.
25 prilli, tha kreu i PDIU, do të jetë dita që do të ndajë Shqipërinë nga një regjim autokratik. Ai tha se mandatet e PDIU do të largojnë Edi Ramën nga pushteti i cili në këtë fushatë shkon përpara qytetarëve pa asnjë bilanc, ndryshe nga sa premtoi në 2017, kur kërkoi “tepsinë” i vetëm.
