Aeroporti i Rinasit nuk do të ofrojë shërbime deri ditën e nesërme. Nuk do të ketë as nisje dhe as ulje të mjeteve ajrore deri të Enjten, ora 10:00, thuhet në një njoftim të Autoritetit Kombëtar të Fluturimeve.
Njoftimi vjen pas mosdakortësisë në takimin mes kontrollorëve dhe ministres së Transporteve Belinda Balluku.
Një ditë më parë, por edhe sot, kontrollorët ndërprenë punën në aeroport. Ata u shprehën se shkak u bënë 5 shkarkime nga puna, të papritura sipas tyre. Në këto kushte, kontrollorët e “Albcontrol” dolën në protestë duke ndërprerë punën dje dhe sot dhe kërkuan kthimin në punë të operatorëve të larguar. Një tjetër kërkesë, ishte rikthimi i pagës së mëparshme.
Ministrja e Infrastrukturës zhvilloi një takim me ta, por mesa duket pa asnjë kompromis, duke vijuar ngërçin e krijuar në aeroport.
Vetë Aeroporti i Tiranës njoftoi më herët gjatë ditës se për shkak të situatës pati probleme me dy fluturime.
Balluku: Grevë ilegale
Në një deklaratë për mediat pas takimit, ministrja e Transporteve, Belinda Balluku tha se kontrollorët kanë ndërprerë punën pas shkurtimit të pagës së tyre nga 4000 në 2490 dollarë. Ajo shtoi se qeveria nuk ka mundësi ti kompensojë.
“Këto paga nuk janë të lidhura me buxhetin e shtetit, por vendosen në marrëveshje mes AITA dhe ofruesit të navigimit ajror, Albcontroll”, u shpreh ministrja.
“Është një grevë e pastër ilegale në thyerje të Kodit të Punës se janë deklaruar të gjithë me të njëjtat letra, me të njëjtin arsyetim – të stresit të madh të përballje së jetës me 2490 dollarë duket futur në kolaps sistemit e navigimit ajror”, tha Balluku.
Më tutje, ministrja e quajti ndërprerjen e punës nga kontrollorët “organizim i mirëfillt politik në moment fushate”.
Balluku paralajmëroi se do ketë ndëshkim nga e shtetit ligjor, ndërsa u bëri apel kontrollorëve të kthehen në punë.
