Kryeministri Edi Rama ka vijuar takimet elektorale në Korçë, nga ku tha se fushata me pak njerëz, është një mundësi për t’i dhënë më tepër peshë të fjalës, si një përgjigje për kundërshtarët politikë.
Rama u shpreh se kjo lloj fushate krijon mundësinë për një bisedë të shtruar dhe gjithçka që thuhet të jetë lehtësisht e dëgjueshme.
“Është vërtet një fushatë e çuditshme sepse mungon zhurma, muzika përthithëse e mijëra e mijëra njerëzve por na jep mundësinë të bëjmë një bisedë të shtruar dhe të kujdesemi që gjithçka që themi të jetë lehtësisht e dëgjueshme dhe e papërzier me zhurmën e entuziazmit ku nuk ka shumë vëmendje për fjalën. Kjo është një fushatë ku fjala ka më shumë vend dhe mundësia për të dëgjuar është më e madhe”, tha Rama.
Ai u shpreh se ambicia në vizionin e Shqipërisë 2030 është ta bëjmë kampione të turizmit në Ballkan, të agro-turizmit dhe në eksporte bujqësore.
“Është e mundur dhe është një proces që ka hyrë në rrugën e tij të realizimit dhe do kërkojë kohën e vet”, tha Rama.
Kreu i qeverisë Edi Rama tha se shumë shpejt do të nisin fluturimet në aeroportin e Kukësit duke theksuar si do bëhet përzgjedhja e atyre që do fluturojnë të parët nga Londra drejt vendit tonë. Rama zbuloi gjithashtu se kompania që po ndërton Portin e Durrësit do të ndërtojë resortin e parë të skive në pikën turistike të Nikolicës.
“Nëse sot ne flasim për disa investime të mëdha në turizëm duke filluar nga investimi i madh në Durrës ku do të investohet për transformimin e zemrës së Durrësit në port turistik ndër më të mëdhenjtë në Mesdhe. Porti i Vlorës është gati për të nisur punën. Porti i Sarandës është në kantier. Dy porte të reja tregtare do ndërtohen në Durrës dhe Vlorë.
Aeroporti i Kukësit për pak ditë hap dyert për uljen e parë të Air Albanias me çunat e Kukësit që do vijnë nga Londra të seleksionuar në bazë të numrit të sharjeve dhe përqeshjeve që më kanë bërë mua kur thoja që do bëjmë Aeroport në Kukës. Në Aeroportin e Tiranës fillon investimi për terminalin e ri dhe zgjatjen e pistës për të garantuar fluturimet transoqeanike
Me kompaninë që ndërton portin e Durrësit kemi nisur diskutimin për pikën turistike të Nikolicës për të ndërtuar resortin e parë të skive atje”, tha Rama.
