Kreu demokrat Lulzim Basha gjatë një takimi të zhvilluar me banorë të Unazës së Re në Tiranë tha se vota më 25 prill për Partinë Demokratike është votë për anëtarësimin e Shqipërisë në Bashkimin Europian.
Nën thirrjet “Rama ik” dhe e “Duam Shqipërinë si gjithë Europa”, kreu demokrat tha se pa parë në sytë e gjithë shqiptarëve ndryshimin që ata presin më 25 prill, ndërsa shtoi se angazhimet që ai ka marrë do të bëhen realitet nga qeveria e drejtuar prej tij.
Basha tha se më 25 prill shqiptarët duhet të ndëshkojnë me votë keqqeverisjen, e cila largoi nga vendi me mijëra shqiptarë dhe sot kërkon të sjellë emigrantë nga Bangladeshi për t´i zëvendësuar.
“Me votën tonë do të marrim hak ndaj çdo padrejtësie që kjo qeveri i ka bërë shqiptarëve në 8 vitet e saj”, tha Basha.
Ai u shpreh se Edi Rama gjithë kohës sulmon opozitën dhe qytetarët, në vend që të japë llogari për dështimet dhe mosmbajtjen e premtimeve.
“Ka vetëm një rrugë, Shqipëria kërkon ndryshim, Tirana do ndryshim. Unë e shoh se ndryshimi ka mbërritur dhe e shoh tek çdo qytetar i ndershëm. 25 prilli është dita juaj, unë kam për detyrë t’ju udhëheqë drejt një politike njerëzore. Sepse politika është për t’i shërbyer njerëzve. Sot vijmë para qytetarëve me një zotim se me ne, demokracia është e garantuar.
Ju ftoj që deri më 25 prill ta bëjmë bashkimin tonë edhe më të madh. Së bashku do të ndalim dorën e grabitje dhe do të ndalojmë që vendi të rrëshqasë sërish në diktaturë. Prandaj sot them se vota për Partinë Demokratike, vota për numrin 9 është vota për ta çuar Shqipërinë në Europë”, tha Basha.