Kryetarja e Lëvizjes për Ndryshim, Jozefina Topalli së bashku me përfaqësuesit e tjerë të partisë së saj vendosi lule në lapidarin e katër dëshmorëve të demokracisë në Shkodër.
Por ajo çfarë ra në sy menjëherë pas largimit të Topallit është largimi i luleve të ish-kryeparlamentares nga vëllai i njërit prej martirëve, Ahmet Kryeziu. Ky i fundit shihet teksa largon nga lapidari të gjitha lulet e vendosura nga partia e Jozefina Topallit, ndonëse njëra prej kurorave të luleve është vendosur edhe nga mbesa e tij Adela Kryeziu e cila është dhe kandidatja e dytë e partisë Lëvizja për Ndryshim.
Kujtojmë se katër martirët e demokracisë janë Arben Broci, Nazmi Kryeziu, Bujar Bishanaku dhe Besnik Ceka të cilët u pushkatuan më 2 Prill të vitit 1991 nga regjimi komunist.
