Batutat/ Rama: Nardi është filozof, Vangjeli ka vetulla me 2 kate dhe Dash Shehin ta puthësh në buzë

Kryeministri Edi Rama duket se e ka përqëndruar fushatën e tij në akuza dhe sulme ndaj drejtuesve të partive opozitare, ndërsa i është rikthyer batutave njëlloj si në zgjedhjet e 2017-ës.

Rama akuzoi opozitën se me mitingjet që organizon është kthyer në një aleate të pandemisë.

“Duke u lutur që Zoti t’i mbrojë ata të cilët udhëheqësi i çon për skrap, le të bëjnë durim deri më 25, dhe të gjithë shqiptarët t’i japin një mësim të madh këtyre honxho-bonxhove që kanë 8 vjet që vetëm helmojnë, shkatërrojnë, që nuk kanë dhënë një kontribut të vetëm. Mirë në kohë normale, por s’kanë dhënë kontributin e tyre as të mirëkuptimit dhe të heshtjes as në kohë tragjedie. Bie tërmet, këta janë me tërmetin, bie flama, këta janë me flamën.

Se këtu akoma ca vazhdojnë me fantazmën, në vend të atyre dy gishtave që u hoqën, kanë Saliun, që është si fantazma. Mirë ky, po është dhe Peço këtu, janë dy doktorë që qëkur ka ardhur virusi janë bërë si virusi.

Kur dëgjon këta, të vjen ta puthësh Dash Shehin në buzë. Këta janë personazhe që në kushte normale janë për të qeshur. Janë dhe për të vajtuar. Por gjyshërit dhe gjyshet nuk po i pyesin fare, se po shkojnë masivisht të vaksinohen,” tha Rama.

Në vijim Kryeministri u shpreh se do të largohet nga drejtimi i qeverisë kur të dalë një më i mirë se ai që të zgjidhë punët e vendit.

Ai tha se nuk ka ndërmend të largohet nga thirrjet “Rama ik” që vijnë prej atyre që s’e mundin dot.

“Nuk e dua mandatin e tretë për vete, kur ta gjeni një më të mirë, iki i lumtur unë. Po s’mund të iki unë se thonë këta “Rama ik”.

LEXO EDHE  VIDEO/ Arrestohen 8 persona në Shkodër, u sekuestrohet kokainë, armë dhe munncione luftarake

Kjo “Rama ik” është thelbi i hallit që ata kanë. Ik, ik, ik , ou? Po hajde pra më mund. Jo mër Lul, nuk është kaq kollaj kjo punë, jo të keqen vëllai se të du shumë.

Ke ra në duar të këqija që kur u nda nga unë. I mbushën mendjen që të ndahej nga unë dhe urdhëro tani, e ka lidh Monika me zinxhir dhe i thotë: “Ssskapeee, skapeee” dhe ai niset”. O Zot. Jo mër jo se është i mirë dreqi”, tha ai.

Mes batutave kreu i qeverisë tha se njerëzit nuk mund të votojnë Lulzim Bashën, pasi përveç se ta shohin në televizor, do i paguajnë dhe taksa.

“Me Lulin e nxjerr nga televizori, e merr në shtëpi, i paguan dhe taksë. Unë mendoj që është budallallëk i madh. Pa llogarit pjesën tjetër, që këtu s’është vetëm Luli, se ky është ta puthësh në ballë, se buzët ia lamë Dash Shehit, se kemi dhe Monikën, se ajo është qamet i madh. Është Iliri, Saliu, se është dhe Vangjel Dule e Shpëtim Idrizi. Idrizi del me sytë e kuq, se fle deri në 2 të drekës, ndërsa Vangjeli del me ato vetullat me dy kate të zeza.

Se për pishtarët është koka e filozofisë Nardi, jua bëj hallall po votuat Nardin, se është filozof. Por shikoni, jemi në pikën që s’kthehemi më mbrapsht. Edhe për të mos shkuar aty, duhet mandati i tretë, që përfundimisht të heqim nga jetët tona, armikun e padukshëm, që të kthejmë në shtëpi familjet e tërmetit,” tha Rama.