Është mbyllur në barazim pa gola pjesa e parë mes San Marinos dhe Shqipërisë, ndeshje e vlefshme për kualifikueset e Botërorit Katar 2022.
Në 45 minutat e para kuqezinjtë e Rejës kanë kontrolluar topin por vetëm kaq, pasi mungon totalisht qartësia para portës. Gjithashtu freskia fizike e futbollistëve tanë lë për të dëshiruar dhe kjo i atribohet edhe faktit që në fushën e lojës luajnë lojtarë të cilët nuk aktivizohen në klubet e tyre.
Përballë kemi një skuadër amatore, ndërsa as këtu Edi Reja nuk e gjen guximin të ndërtojë një ekip sulmues, teksa mesfusha kuqezinjve e përbëjnë pak a shumë lojtarë me cilësi mbrojtëse përjashtuar këtu Rei Manaj, i cili ka zhgënjyer totalisht në 45 minutat e para.
Për të përmbledhur takimin deri në këtë momente, po shohim 11 persona që shëtisin fanelat në fushën e blertë pa ndonjë ide të qartë se si të shkohet te porta kundërshtare, ndërsa puna e trajnerit duket inekzitente.
Krenaria e futbollit shqiptar prej disa kohësh tashmë ka marrë fiks ‘çehren” e trajnerit, që është një kombëtare e ‘plakur’ në lojë, pa grintë, pa shpirt gare.
