Pas Kryeministrit Edi Rama që i ka kërkuar 153 kandidatëve socialistë që të mos kërkojnë vota për emrat e tyre personal, duke shpërndarë numrin që mbajnë në listën e kandidatëve, edhe demokratët kanë shpërndarë një udhëzim të ngjashëm, ku kandidatëve u kërkohet që në posterat që afishojnë të kenë vetëm nr 9, atë që përkon me numrin që mban koalicioni PD-AN në fletën e votimit.
Përmes një njoftimi drejtuar të gjithë kandidatëve të saj, PD kërkon vendosjen në postera vetëm të numrit 9, që është dhe numri i Partisë Demokratike në listën e votimit.
“Sikurse iu është dhënë si porosi, kërkohet nga ju që, Posterat duhet t’i publikoni apo printoni siç ju ka ardhur formati zyrtar. Nuk lejohet asnjë ndryshim nga ana juaj. Kush ka bërë ndryshime, duhet t’i hiqni menjëherë (që sot). Përdorimi i numrit tuaj personal nga disa prej jush ka krijuar konfuzion dhe dëmton drejtpërdrejt numrin e të gjithëve që është një dhe vetëm një, 9-PD-AN.
Prandaj, të nderuar kandidat/e, votuesin do ta ftojmë të gjithë së bashku të votoj nr. 9. Në të gjitha materialet zgjedhore (postera, bluza, byzylyk, virtual e material) duhet të përdoret vetëm numri 9. Vendimi i kryesisë së PDSH dhe Shtabit Qendror të fushatës është imazhi i standardizuar. Bashkëlidhur po ju ridërgoj imazhin e vetëm për postera dhe cover foto në rrjetet tuaja sociale.
Faleminderit për mirëkuptimin”, thuhet në njoftimin që i është shpërndarë kandidatëve të PD për deputet.
Duket se fushata personale e kandidatëve të përfshirë kryesisht në atë që konsiderohet si pjesa jo preferenciale e listës dhe promovimin i numrit që mbajnë në renditje ka krijuar konfuzione, por ndoshta edhe përplasje mes vetë kandidatëve.
Kjo ndoshta është arsyeja që si Rama ashtu edhe Basha kanë kërkuar që të promovohet vetëm numri që partitë ose koalicionet mbajnë në fletën e votimit, pra që votat të shkojnë për partitë.
