Lëvizja Vetëvendosje, dega Shqipëri, ka reaguar lidhur me deklaratat e Kryeministrit Edi Rama, ku në Shkodër gjatë një takimi me pronarin e një biznesi fason, i sugjeroi që të marrë punëtorë nga Afganistani apo Bangladeshi, pasi nuk dinë shqip dhe do jetë rehat.
“Sot doli edhe një tjetër deklaratë e Edi Ramës, ku ai përbuz punëtorët dhe shpall urrejtje ndaj tyre. Kjo ideologji, e papërgjegjshme ndaj detyrave të qeverisë për garantimin e të drejtave të tyre, shfaq mosinteresimin e thellë të Kryeministrit të vendit për çështjen punëtore në Shqipëri.
Kryeministri dëgjohet tek këshillon një sipërmarrës fasonerie në Shkodër që të marrë punëtorë nga Bangladeshi, Afganistani a India, me kusht që nuk dinë të flasin në shqip, që të mos mund të komunikojnë për lirinë, demokracinë, të drejtat e tyre, apo të kritikojnë qeverinë. Rama pastaj u kërkoi sipërmarrësve që t’i largojnë edhe punëtorët e ardhur sapo ata të mësojnë shqip.
Një gjuhë e tillë përbuzëse, poshtëruese, urrejtëse, ndaj shqipes e punëtorëve shqiptarë, ndaj atyre që duan demokraci e të drejta tregon sa i rrezikuar ndihet regjimi prej tyre, e njëkohësisht sa i rrezikshëm është bërë për ta”, thuhet në deklaratën e VV Shqipëri.
Në vijim theksohet se “ne jemi të vetëdijshëm që deklarata e Kryeministrit është vetëm maja e ajsbergut kur mendojmë trajtimin e përditshëm të punëtorëve në vendet e tyre të punës”.
“Vendi ynë ka nevojë për një qeveri dhe për ligjdhënës të cilët sigurohen që çdo çështje ekonomike dhe politike duhet të vlerësohet edhe nga perspektiva e punëtorëve dhe e garantimin të të drejtave të tyre.
Ne jemi të përkushtuar që të jemi zëri i punëtorëve në parlamenti. #KrejtTjeter dhe #Përpunëkrejttjetër.
Mesazhi ynë për Ramën dhe për servilët apo të ngjashmit e tij është ky: më lehtë e kemi t’ju zëvendesojmë ju me ndonjë bangladeshas, apo njeri të çdo kombi, që i do shqiptarët, se sa ju të na zëvendësoni ne të gjithëve me njerëz të pagojë!”, thuhet në deklaratë
