KLP shkarkon nga detyra prokurorin Bujar Memia. Vendimi u morr këtë të Mërkurë nga Këshilli i Lartë i Prokurorisë me 10 vota pro dhe 1 kundër (Nurihan Seiti).
Shkarkimi i Memias u kërkua nga Inspektori i Lartë i Drejtësisë, Artur Metani, duke argumentuar se me mosankimin e tij, ka lejuar që vendimi për lirimin me kusht të Hekuran Billës, të mos kontrollohet nga gjykatat më të larta.
“Pasiviteti dhe mosveprimi i prokurorit për të kontrolluar ligjshmërinë e kësaj vendimarrje ndikoi në uljen e besimit publik tek sistemi gjyqësor, dhe nxiti hakmarrjen ndaj të dënuarit”, u shpreh ILD.
Billa, i cili ishte dënuar për vrasje në Mbretërinë e Bashkuar, u vra në një atentat pak kohë pasi u la i lirë nga Gjykata e Krujës. Sipas hetimeve, krimi ndodhi për motive hakmarrje për vrasjen e ndodhur në Britani.
Për të njëjtën çështje, u shkarkua nga detyra gjyqtarja Enkeleida Hoxha, e cila vendosi lirimin me kusht të Hekuran Billës, i dënuar me burgim të përjetshëm në Mbretërinë e Bashkuar për vrasjen e kryer në 2006-ën.
Më herët, KLP ka zhvilluar online seancat ku ILD dhe mbrojtja e prokurorit Memia kanë parashtruar kërkesat dhe argumentat e tyre. Këtë të Mërkurë, Këshilli i Lartë i Prokurorisë vendosi në favor të kërkesës së ILD, duke shkarkuar nga detyra prokurorin e Krujës.
DENONCO