Mediu thirrje të rinjve: Jo peng i Edi Ramës, më 25 prill votoni ndryshimin

Kreu republikan Fatmir Mediu, i cili renditet I 7-ti në listën e kandidatëve për deputet në qarkun e Tiranës, në listën shumëemërore të koalicionit që drejtohet nga Partia Demokratike, “Aleanca për Ndryshim”, shprehu besimin dhe optimizmin e tij të plotë për rininë dhe i cilësoi ata si katalizator të ndryshimit.

Mediu shprehu shqetësimin e tij për largimin e të rinjve dhe rrezikun që i kanoset sot familjes shqiptare nga ky fenomen.

Mediu deklaroi se rinia nuk duhet të lejojë një njeri të vetëm të vjedhë ëndrrat dhe të ardhmen e tyre, të shkatërrojë arsimin, ekonominë dhe familjen që është baza e shoqërisë. Ai i bëri thirrje që të marrin fatet e veta në dorë dhe të bëhen mesazherë të shpresës dhe optimizmit.

“Në pesë të rinj, tre nga ata janë të pa punë. Gjatë pandemisë kjo papunësi u shtua dhe me 20%. Mbi 70% e të rinjve duan të largohen nga Shqipëria. Mbi 90% e atyre që kanë studiuar jashtë dhe studiojnë jashtë, me mundin dhe djersën e prindërve të tyre, nuk duan të kthehen në Shqipëri. Mbi 500 mijë shqiptarë janë larguar, pjesa më e madhe të rinj dhe të reja, intelektualë, profesionistë, duke krijuar kështu një problem shumë të madh në vendin tonë, për familjet tona, një problem të madh sa social, por edhe ekonomik dhe politik.”

LEXO EDHE  "Delta" nuk lejon përhapjen e variantit "Mu", Alimehmeti: Mos kini frikë

Mediu u shpreh se ka gjithmonë shpresë kur ka rini kaq potenciale dhe energjike.

“Ne kemi shumë për të bërë dhe ajo që është shumë e rëndësishme, po e filloj nga mundësia për arsim dhe edukim që duhet të ketë brezi i ri. Prandaj për të gjykuar në datën 25 Prill se si duhet votuar, do t`ju lutesha ju të rinjve, por dhe ne të tjerët, të gjykojmë me njëri-tjetrin në familje. Jetën, lirinë dhe dinjitetin jau ka falur Zoti dhe mos i lini peng as të Edi Ramës dhe as të ndonjë politikani tjetër. Atë cka jua ka dhënë Zoti mbajeni fort, zhvillojeni sepse jeni njerëz që i keni të gjitha dhuntitë dhe duhet të keni dinjitetin për t`i cuar gjërat përpara dhe për të dhënë zgjidhjet e duhura”, deklaroi Mediu.