Tre persona janë arrestuar nga policia në Tiranë në kuadër të aksionit të koduar “Weekend”, që kishte si qëllim goditjen e trafikut të paligjshëm të armëve dhe narkotikëve.
Aksioni, që u finalizua pas 6 muajsh hetime, ka çuar në sekuestrimin e dy pistoletave dhe një sasi droge.
U arrestua Vladimir Gjoci, 46 vjeç, për veprat penale “Prodhimi dhe shitja e narkotikëve dhe “Trafikimi i armëve dhe i municionit” dhe Gehard Gaci, 26 vjeç, për veprën penale “Prodhimi dhe shitja e narkotikëve”. Ndaj tyre, gjykata kishte vendosur masën e sigurisë arrest me burg në mungesë.
Po ashtu, në pranga u vu italiani Marco Maraschio, 40 vjeç, i dënuar disa herë në Itali në fushën e trafiqeve të paligjshme, bashkëpuntor i Vladimir Gjocit.
Hetimet
Gjatë kontrollit të banesës së shtetasit Vladimir Gjoci u gjetën dhe u sekuestruan 2 armë zjarri pistoletë, një sasi më lëndë narkotike kokainë dhe heroinë, një sasi municioni luftarak dhe sende të tjera të kundërligjshme.
Nga hetimet ka rezuluar se shtetasi Vladimir Gjoci, së bashku me shtetasin italian Marco Maraschio, banues në Lecce, Itali, mereshin me trafikimin e armëve luftarake nga Italia në Shqipëri, të cilat i shisnin më pas në qytete të ndryshme të Shqipërisë.
Gjatë kontrollit fizik, shtetasit italian i është sekuestruar edhe një sasi lënde narkotike e llojit heroinë.
Ndërsa shtetasi Gehard Gaci merrej me shpërndarjen e lëndëve narkotikëve, të cilat i merrte nga shtetasi Vladimir Gjoci.
