Kryeministri Edi Rama tha mbrëmjen e sotme se nuk ka asnjë arsye që të verë në dyshim përcaktimin e Departamentit amerikan të Shtetit ndaj Tom Doshit i përfshirë në listën e zezë të SHBA për korrupsion domethënës.
Por Rama tha se Tom Doshi i duket një ëngjëll krahasuar me Sali Berishën, Ilir Metën apo Monika Kryemadhin.
“Tom Doshi më ngjan ëngjëll krahasuar me këto tre, por nuk e vë në diskutim aspak përcaktimin e DASH për të. Unë e kuptoj sepse SHBA nuk mban të njëjtin qëndrim ndaj Berishës, Ilirit apo Monikës sikundër në rastin e Tom Doshit. Tom Doshi nuk është as aleati ynë dhe as do jetë në qeveri me ne”, tha Rama.
Sipas tij, nëse Tom Doshi është rrezik për PD sepse kandidon atje, për mua rrezik janë Sali Berisha, Ilir Meta, Monika Kryemadhi dhe ajo shporta e karavidheve që quhen sot opozita e bashkuar.
Rama shmangu përgjigjen e drejtëpërdrejtë nëse ai e dëshiron Tom Doshin si deputet në Kuvend apo jo, ndërsa shtoi se “nuk jam unë ai që caktoj se kush shkon dhe kush nuk shkon në Parlament”.
“PD s’mund të flasë për Tom Doshin për korrupsion domethënës, pasi ata kanë Berishën atje”, tha Rama.
