Këshilli Bashkiak i Shkodrës “ngrin” Vllazninë për miratimin e një fondi prej 820 milionë lekësh të vjetra.
Në rast të një përgjigje pozitive, Vllaznisë do t’i hapej rruga për marrëveshje me Tatimet për borxhin që mësohet se ka shkuar rreth 1.6 miliardë lekë. Por anëtarët e Këshillit Bashkiak kanë votuar masivisht (33 vota kundër) kundër projektvendimit të kërkuar nga kryebashkiakja e Shkodrës, Voltana Ademi, e cila është njëherësh edhe presidente “de jure” e klubit kuqeblu.
Ndërkohë, tashmë pas këtij bllokimi, situata te Vllaznia bëhet edhe më e vështirë për të shpresuar te licencimi nga UEFA. FSHF pret dokumentacionin e plotësuar nga klubi shkodran deri më 31 mars, por pas mbledhjes së Këshillit Bashkiak, në Shkodër komplikohet situata.
Vullneti për zgjidhje duket se mungon dhe Vllaznia përtej ecurisë së mirë, mund të “djeg” sezonin në rast se FSHF nuk e licencon për të marrë pjesë në Kupat e Europës.
