“Rilindja është zero është e pashpresë, ndaj përpiqet të shtrëngojë situatën me komitetin e partisë që e quan komiteti teknik”.
Kështu deklaroi ish-deputeti dhe kandidati i PD në Tiranë Flamur Noka në emisionin “Frontline” të gazetares Marsela Karapanço në News24. Noka komentoi dhe takimet e PD me qytetarët, të sulmuara nga maxhoranca e cila deklaron se po shkelen masat kundër COVID-19. Ai tha se këto takime tregojnë se ka shpresë tek opozita.
“Shpresa në këtë vend po ngjallet sepse ka qenë e vrarë dhe nuk ka gjë më të mirë kur shikon që ka shpresë. Nuk ka gjë më të mirë kur shikon që shpresa është tek opozita dhe kjo gjë duhet të përshëndetet. Distancimi është një gjë për të cilën opozita ka bërë thirrje”, tha ai.
Sa i përket vendimit të KAS për listën e PD, Noka deklaroi se nuk ka të bëjë me shkeljen e ligjit, por me mundësinë që një forcë politike të ketë një rezervë njerëzore.
“Ligji kërkon një numër kandidatësh të caktuar sipas zonave zgjedhore. Nëse një forcë politike ofron më shumë emra nuk ka të bëjë me shkeljen e ligjit, por me mundësinë që forca politike ka për të pasur një rezervë njerëzore. PD ka potenciale të pafundme për fushatën sot dhe qeverisjen nesër, ndryshe nga maxhoranca që është e shteruar”, tha ai.
Noka theksoi më tej se opozita, PD synon më së pakti 20 mandate në Tiranë. “Maxhoranca maksimumin e saj që ka parashtruar në fillimin e fushatës ka qenë 18. Hera e parë që ka një synim kaq të ulët, sepse ata e dinë shumë mirë që janë në prag të një disfate. Askush më, qytetar i denjë i Tiranës nuk beson më tek rilindja. Rilindja është e dështuar, është një i vdekur i pakallur.
Numri që PD ka të sigurt në Tiranë, është numri 20. Të diskutosh për numra më poshtë 20 është si të luash me të paluajturën”, u shpreh ai.
Sa i përket renditjes së tij, i 14-ti në Tiranë, Noka deklaroi se nuk ka asnjë rëndësi numri apo renditja, por fitorja e së mirës mbi të keqen.
“Kam një investim jetësor në këtë forcë politike dhe për mua nuk ka qenë e rëndësishme as numri as vendi, e rëndësishme që të mbizotërojë e mira mbi të keqen. Nuk kam asnjë lidhje me hatërmbetjet. Për mua është një gjë thelbësore, fitorja e së mirës ndaj së keqes, fitorja e PD. Më i rëndësishëm se vendi është e rëndësishme të triumfohet mbi këtë të keqe që ka kapluar vendin.
Ka qenë një kërkesë e imja, në bashkëpunim me kryetarin e partisë sepse Tirana është fushëbeteja kryesore e opozitës. Në këtë aspekt roli im dhe kontributi do ishte shumë më domethënës. Edi Rama e ka vrarë shpresën në këtë vend. Është PD dhe opozita që po ngjall shpresën. S’mund të flasë për shpresën ai që përzuri 500 mijë shqiptarë. Do të thotë që ti po e përdhunon këtë popull. Ai që mund të flasë për shpresën është Lulzim Basha dhe opozita”, deklaroi Noka.
