Edicioni i ri i Kategorisë Superiore pritet të ketë shumë ndryshime. Veç sistemit VAR për arbitrimin, FSHF ka në plan që mos licensojë asnjë klub që nuk ka në stadium një impiant funksional ndriçimi. Kështu, nisur nga sezoni i ri klubet në Superligën shqiptare do duhet të plotësojnë edhe këtë kusht, nëse duan të marrin pjesë në kampionat.
Nëse i hedhim një sy këtij edicioni, katër klube do ishin jashtë për mungesën e këtij kriteri. Kastrioti, Laçi, Kukësi dhe Bylis nuk kanë mundësi të luajnë me drita artificiale, teksa probleme kanë Tirana dhe Apolonia. Me stadiumin e ri, Kukësi pritet të zgjidhë këtë pengesë, ndërsa i menjëhershëm duhet të jetë reagimi i Bylis, Kastriotit dhe Laçit, që nuk disponojnë një të tillë.
Pritet që FSHF t’u vijë në ndihmë klubeve me financat përkatëse, teksa Superliga e edicionit të ri pritet me shumë ndryshime edhe në oraret e ndeshjeve, gjykimin apo sistemin VAR.
