Dita e djeshme, e shtunë 20 mars, nisi me ekzekutimin mafioz të 40-vjeçarit Edmond Koçi, i njohur ndryshe edhe si Mond Çekiçi.
Ai u ekzekutua në Durrës, ndërsa kishte vetëm pak muaj që kishte dalë nga burgu pasi ishte arrestuar dhe dënuar për armëmbajtje pa leje.
Çekiçi po udhëtonte me një automjet, kur autorët i prenë rrugën dhe qëlluan me breshëri automatike, duke i shkaktuar vdekjen e menjëhershme. Policia arriti të gjejë një automjet të djegur pas ngjarjes, me targa false, ndërsa dyshohet se në ngjarjen e rëndë janë përfshirë dy persona.
Në orët e pasdites dy ngjarje njëra pas tjetrës tronditën kryeqytetin dhe kryeqendrën e veriut, Shkodrën.
Dy vëllezërit Hoten dhe Marjan Doçaj u plagosën me armë zjarri nga Besmir Përkolaj, teksa ishin dukë udhëtuar me automjetin e tyre tip “Audi” në fshatin Bardhaj të Shkodrës. Vëllerëzit Doçaj janë të afërm me Gentian Doçin, ky i fundit një emër i njohur për policinë dhe i dyshuar si organizatori i pengmarrjes së Jan Prengës në Kamëz,raporton abcnews.
Një konflikt i ndodhur dy ditë më parë në kryeqytet për pak sa nuk u kthye në një ngjarje të rëndë. Ronaldo Gurabardhi qëlloi me armë zjarri në ajër, në afërsi të një banese në zonën e Kombinatit pas një konflikti me Artur Korteshin, me të cilin kishte debatuar dy ditë më parë.
