Deklarata e kandidatët socialiste për deputete në qarkun e Tiranës, Luljeta Bozo pak ditë më parë mbi komunizmin dhe të mirat e tij që ishin më shumë sesa të këqijat bëri xhiron e rrjetit.
Bozo ka sqaruar së fundmi në një intervistë në Neës24 se deklarata e saj është keqpërdorur dhe se ajo e dënon me forcë komunizmin, duke shtuar se nuk ka asnjë dyshim që Enver Hoxha ishte diktator.
“Unë kam një jetë të jetuar me parimet e me punën time dhe bindjet e mia as nuk i kam negociuar, as kam ndërmend t’i negocioj në këtë moshë me askënd! Për më tepër nuk kam ndërmend të merrem me ata që merren me shtrembërimin e fjalëve te mia, për qëllime të rëndomta politike. Diktaturën komuniste e dënoj me forcë dhe Enver Hoxha padyshim ishte një diktator. Por refuzimi i çdo relativizimi të krimeve të diktaturës, nuk më pengon dot të vlerësoj me respekt shkencëtarët dhe profesionistët e asaj kohe dhe gjithë popullin e thjeshtë që kanë punuar me ndershmëri.
Pafuqia për të mos e parë atë kohë vetëm bardhezi është sindromë e sërvilëve apo spiunëve të atëhershëm, që janë “xhelatët” e mendimit ndryshe të këtyre 30 vjeteve. Kush kapet pas Enverit për të sulmuar të tjerët është në fakt një zëdhënës i pavetëdijshëm i së keqes së asaj diktature. Ata që shajnë, akuzojnë dhe shtrembërojnë njësoj si xhelatët e mendimit ndryshe asokohe. Ekstremet përputhen dhe më kujtohet Vaclav Haveli që thotë: Komunisti më i zi është komunisti antikomunist! Kam vetëm keqardhje per ta,” tha Bozo.
Pak dite me pare, e pyetur për kohën e komunizmin e të Enver Hoxhës, Bozo tha se periudha 45-vjeçare e Enver Hoxhës kishte më shumë të mira sesa efekte negative në vend. Pas deklaratës pati një seri reagimesh, që duket se kanë detyruar kandidaten e Rilindjes të tërhiqet nga mendimet se diktatura ka prodhuar më shumë të mira.
