Policia e Vlorës, ka arrestuar dy të rinj. Të arrestuarit janë E. B., 29 vjeç dhe A. M., 20 vjeç, të dy banues në qytetin bregdetar.
Policia njofton se nga informacionet e marra në rrugë operative, kanë mësuar se dy personat në fjalë ushtronin aktivitet kriminal në fushën e narkotikëve.
Arrestimi është bërë në lagjen “Pavarësia”, ku pas kontrolleve, atyre i janë gjetur 1.870 fara kanabisi dhe dy celularë.
Materialet iu referuan Prokurorisë së Rrethit Gjyqësor Vlorë, për veprime të mëtejshme hetimore.
Njoftimi i plotë i Policisë:
Vijon puna e pandërprerë për parandalimin, evidentimin dhe goditjen e veprimtarisë kriminale në fushën e narkotikëve.
Sekuestrohen fara kanabisi, arrestohen në flagrancë 2 shtetas.
Specialistët për Hetimin e Narkotikëve, në bashkëpunim me Forcën Operacionale në DVP Vlorë, në zbatim të planit të masave për goditjen e veprimtarisë kriminale në fushën e narkotikëve, pas informacioneve të marra në rrugë operative se dy shtetas ushtronin aktivitet kriminal në fushën e narkotikëve, kanë organizuar punën për kapjen e tyre. Si rezultat janë arrestuar në flagrancë shtetasit:
E. B., 29 vjeç dhe A. M., 20 vjeç, banues në Vlorë.
Arrestimi i tyre u bë pasi në lagjen “Pavarësia”, Vlorë, shërbimet e Policisë kanë kapur në flagrancë shtetasin E. B, duke i dorëzuar një sasi me fara kanabisi shtetasit A. M.
Gjatë kontrollit fizik të ushtruar ndaj shtetasit A. M. dhe kontrollit të ushtruar në banesën e shtetasit E. B., shërbimet e Policisë kanë gjetur dhe sekuestruar në cilësinë e provës materiale, 1870 fara të bimës cannabis sativa dhe 2 aparate celular.
Materialet iu referuan Prokurorisë së Rrethit Gjyqësor Vlorë, për veprime të mëtejshme hetimore.
