Gabimet e arbitrave në Kategorinë Superiore ose Kupë janë bërë tema diskutimi. Sokol Jareci, disenjatori i Gjyqtarëve në Sektorin e Arbitrave në FSHF ka dhënë një intervistë për RTSH. Ai thotë se ardhja e VAR nuk do zgjidh gjithçka.
Problematikat janë të shumta, me teknologjinë e futbollit që do mbushte disa boshllëqe. ndaj Gjithashtu, sipas tij, gabimet që po bëhen nga gjyqtarët nuk po ndikojnë në rezultat.
“Ky është hapi i parë i trajtimit të operatorëve, pjesë shumë e rëndësishme e implementimit të VAR. Janë ato persona të cilët do të përcjellin pamjet dhe këndet që do të bëjnë të mundur vendimmarrjen e saktë. Ne kemi vazhduar gjatë gjithë kohës me trajnimin e arbitrave dhe asistentëve. Hapi i radhës do të jetë puna në stadium, trajnim në një ndeshje ku do të testohet sistemi offline, pa ndërhyrë në punën e arbitrit.
Sistemi VAR nuk zgjidh problematikën e arbitrimit, minimizon gabimet, por gjithmonë do të ketë problematika, sepse janë njerëzit ata që përdorin sistemin VAR.
Janë po ata të cilët një javë më parë apo një javë më mbrapa kanë qenë në fushë me bilbil dhe një ditë pastaj marrin vendimit nga ana e ekranit. VAR është goxha i kushtueshëm, por çdo gjë që bëhet për të mirën e futbollit, kostot kalojnë në plan të dytë.
Akuzat për arbitrat në ndeshjet e fundit? Gabimet e arbitrave nuk kanë vendosur ndeshjet. Ka pasur disa gabime që kanë qenë të dukshme, por të tjerat janë të diskutuara në studio më shumë.
Por ne si Sektor Arbitrimi vazhdojmë të themi se nuk kemi dorë akoma në vendosjen e rezultateve. Pra gabimet do të jenë javë pas jave, por shpresoj deri në fund të kampionatit që arbitrat të mos jenë protagonistët në vendosjen e rezultateve” – tha ai.
