Kryeministri Edi Rama zhvilloi sot një takim me kandidatët e Partisë Socialiste në Qarkun e Shkodrës dhe me strukturat drejtuese të kësaj partie, ndërsa kërkoi mandatin e 3-të qeverisës, për të vijuar me projektet dhe transformimet e qytetit.
Megjithëse nuk ka një bilanc të 8 viteve të qeverisjes së tij mbi realizimin e premtimeve që ka bërë nga momenti që mori mandatin e parë si Kryeministër, Rama po kërkon mandatin e 3-të me pretendimin për realizimin e projekteve për të cilat nuk ka dhënë asnjë shpjegim sepse nuk janë realizuar në 8 vite edhe pse janë premtuar prej tij.
Sot nga Shkodra Rama nuk kurseu në kritika Kryebashkiaken Voltana Ademi, ndërsa u shpreh se për Shkodrën nuk është bërë aq sa duhet jo se ka munguar vullneti, por sepse s´ka pasur kohën e mjaftueshme. Gjithashtu Rama ka zgjedhur Shkodrën për ta krahasuar veten me një kalë që të nxjerrë në breg, ndërsa pak javë më parë e krahasoi veten me gomarin. Nuk është çudi që deri në fund të fushatës Kryeministri ta krahasojë veten me të gjitha llojet e kafshëve me synim për të mbledhur votat.
“Për të gjitha projektet kemi nevojë për besimin e shkodranëve dhe shkodraneve që besoj se do ta shohin Shkodrën të parën që të shohin se kush është kali që i nxjerr matanë lumit.
Faktikisht në Malësi të Madhe kemi hapur jo thjesht një rrugë të re, që të çon në kufi aty ku gjenden një parajsë e Shqipërisë, por kemi hapur një rrugë të re për turizmin.
Në atë zonë bukuria ka qenë gjithmonë aty, por kushtet e infrastrukturës nuk stimulonin ardhjen e vizitorëve. Mjafton të shihet Tamara si ishte dhe se si është, ku maksimumi mund të gjeje dyer për të luajtur bingo, ndërsa sot ajo ekonomi e vogël po ecën”, tha Rama.
Ai theksoi se në Shkodër mund të ishte bërë më shumë, por kjo nuk është për shkak të mungesës së vullnetit, por për shkak të kohës së pamjaftueshme.
Rama gjithashtu kritikoi kryetaren e bashkisë së Shkodrës Voltana Ademi, në lidhje me qendrën e vaksinimit, që është bërë në stadiumin “Loro Boriçi”, pasi sipas tij është lënë në gjendje të mjerueshme me një mjedis të papastër.
Kryeministri gjithashtu theksoi se lideri i opozitës Lulzim Basha ka rrezikuar shëndetin e qytetarëve në takimet e tij në fushatat elektorale, ndërsa theksoi se beteja me Covid-19 vijon deri në zhdukje e këtij virusi të rrezikshëm.
“Lufta me armikun e padukshëm që jam shumë i vendosur që ta largoj nga Shqipëria një orë e më parë duke respektuar rregullat. Në këtë situatë bëhen shfaqje spontane…Këto janë skena që nuk i takojnë një force politike që e ka seriozisht të qenurit alternativë e vendit dhe nuk mund të shmangim efektet e virusit sa hap e mbyll sytë.
Jemi të detyruar të ecim me nevojën për të mos ndaluar frymëmarrjen, por nuk mund të jemi me virusin as me vetëdije dhe as pa vetëdije për të bërë luftë politike apo fushatë elektorale. Kjo është neveritshme. Unë e di që gjasat që kjo të ndryshojë, janë zero por di që të përsëritësh të njëjtën gjë dhe të presësh rezultat tjetër është karakteristikë e budallenjve”, tha Rama.
