Kryeministri Edi Rama mbrëmjen e sotme ka reaguar në rrjetet sociale lidhur me procesin e vaksinimit të arsimtarëve.
Rama shkruan se ai dhe Qeveria po bëjnë çmos, për të intensifikuar vaksinimin. Rama ka hedhur akuza ndaj opozitës, duke thënë se po vendos interesin partiak dhe fushatën elektorale mbi detyrën për mbrojtjen e shëndetit të njerëzve.
“Lufta për t’u çliruar nga pandemia është sfida e sfidave, që duhet të na bashkojë të gjithëve, duke bërë secili detyrën e vet për të mbrojtur të tjerët, me forcën e shembullit e me gjithçka ka në dorë!
Unë dhe shumica qeverisëse po bëjmë çmos, për të intensifikuar vaksinimin, por pa harruar respektimin e rregullave, por fatkeqësisht opozita po vendos interesin partiak, fushatën elektorale, mbi detyrën për mbrojtjen e shëndetit të njerëzve…
Ne do të vazhdojmë, pa u lodhur, të luftojmë me gjithsej për ta nxjerrë popullin nga tuneli i pandemisë, duke vaksinuar, vaksinuar, vaksinuar dhe për ta lehtësuar sezonin e ardhshëm turistik, bashkë me ekonominë e me jetën komunitare. Dhe do t’ia dalim, medoemos”, shkruan Rama.
Në fakt procesin e vaksinimit, Rama e ka kthyer në një proces tërësisht elektoral, duke tentuar të fitojë pikë para zgjedhjeve të 25 prillit. Rama shfaqet kudo ku ka vaksina, jo vetëm në Rinas kur ato vijnë, por edhe në qendrat e vaksinimit.
